भक्तपुर : नेपाल मजदुर किसान पार्टी (नेमकिपा) का अध्यक्ष एवं वरिष्ठ बामपन्थी नेता नारायणमान बिजुक्छें रोहितले परिवर्तन रातारात नहुने बताएका छन् ।
निर्वाचन क्षेत्र नम्बर १ को भक्तपुर-५ स्थित विद्यार्थी निकेतन मतदान केन्द्रमा आफ्नो मतदान पछि सञ्चारकर्मीलाई प्रतिक्रिया दिँदै उनले भने, 'विद्यालय तह पास गर्न त १० वर्ष लाग्छ, समाज परिवर्तनको लागि पनि समय लाग्छ।'
अध्यक्ष बिजुक्छेंले बिगतमा बहुदल र निर्दलको जनमत संग्रहमा जस्तो रेडिमेट परिणाम स्वीकार्य नहुने समेत बताए। २४ घण्टामा मत परिणाम घोषणा गर्ने भन्दैमा जे मन लाग्यो त्यही गर्न नहुने र परिणाम पारदर्शी हुनुपर्ने उनको भनाइ छ । 'क्षेत्र हेरेर उपयुक्त परिणाम आएन भने शंका गर्ने ठाउँ धेरै हुन्छ ।'उनले भने ।
भक्तपुर- १ नेमकिपाको आधार क्षेत्र मानिन्छ । यहाँबाट २०४८ देखि लगातार ५ पटक अध्यक्ष बिजुक्छें निर्वाचित भएका थिए । त्यसयता पनि लगातार दुई पटक पार्टी सचिव प्रेम सुवाल प्रतिनिधि सभा सदस्य निर्वाचित भएका थिए ।
अघिल्लो पटक ३० हजार बढी मतान्तर निर्वाचित सुवाल नै तेस्रो पटक नेमकिपाको उम्मेदवार रहेका छन् । संसदीय राजनीतिमा बिश्वास नगर्ने र क्रान्तिकारी संसदवादको वकालत गर्ने नेमकिपाले देशैभर १ सय २० निर्वाचन क्षेत्रमा उम्मेदवार खडा गरेको छ । निर्वाचित भए पनि सरकार नबनाउने र सरकारमा सामेल नहुने नेमकिपाको स्पष्ट नीति रहँदै आएको छ ।
प्रतिक्रिया दिनुहोस !
