विराटनगर : मोरङको तीनवटा निर्वाचन क्षेत्रमा जारी मतगणनामा राष्ट्रिय स्वतन्त्र पार्टी (रास्वपा)का उम्मेदवारले मतान्तर बढाउँदै लगेका छन् ।
मोरङ–१, ४ र ५ नम्बर क्षेत्रमा जारी मतगणनाको पछिल्लो विवरण अनुसार रास्वपाले अन्य उम्मेदवारलाई निक्कै पछाडि पारेको हो । क्षेत्र नम्बर ५ मा रास्वपाकी आशा झा १ हजार २२९ मतसहित अग्रस्थानमा छिन् । जनता समाजवादी पार्टी (नेपाल)का राजकुमार यादव ५६५ मतसहित दोस्रो र नेपाली कम्युनिष्ट पार्टी (नेकपा)का शिवकुमार मण्डल (केवट) ३४५ मतसहित तेस्रो स्थानमा छन् । नेपाली कांग्रेसका फुलकुमार लालवानी ३२७, नेकपा (एमाले)का मनोजकुमार अग्रवाल २७६ र राष्ट्रिय ऊर्जाशील पार्टी नेपालका योगेन्द्र मण्डलले १०९ मत पाएका छन् ।
त्यस्तै, क्षेत्र नम्बर १ मा रास्वपा उम्मेदवार अज्ञमणि न्यौपानेले मतान्तर फराकिलो पारेका छन् । हालसम्म गणना भएको मतअनुसार न्यौपानेले २ हजार २६९ मत ल्याएका छन् । दोस्रो स्थानमा रहेकी श्रम संस्कृति पार्टीकी उम्मेदवार शान्ति पाख्रिन लामाको १ हजार ३०४ मत छ ।
नेपाली कांग्रेसका उम्मेदवार खड्गबहादुर फागो तेस्रो स्थानमा छन् । फागोले हालसम्म ९७५ मत प्राप्त गरेका छन् । त्यस्तै, नेकपा (एमाले)का उम्मेदवार घनश्याम खतिवडाले ५५९ मत पाएका छन् ।
मोरङ क्षेत्र नम्बर ४ मा पनि रास्वपाका उम्मेदवार सन्तोष राजवंशीले मतान्तर फराकिलो बनाउँदै लगेका छन् । राजवंशी ५ हजार ६३६ मत ल्याएर पहिलो स्थानमा रहेका छन् ।
दोस्रो स्थानमा रहेका नेपाली कांग्रेसका उम्मेदवार गुरुराज घिमिरेको रूख ९५३, तेस्रो स्थानमा रहेका नेपाली कम्युनिष्ट पार्टी (नेकपा)का अमनलाल मोदीको ९२० र चौथो स्थानमा रहेका एमालेका जीवन घिमिरेको ५८६ मत छ ।
मोरङको क्षेत्र नम्बर ३ मा भर्खरै मतगणना सुरु भएको छ । क्षेत्र नम्बर १ र ६ मा मतगणनाको तयारीका लागि सर्वदलीय बैठक बसिरहेको छ । प्रारम्भिक नतिजाले यसपटकको निर्वाचनमा रास्वपाले परम्परागत ठूला दलहरूलाई चुनौती दिइरहेको देखाउँछ ।
प्रतिक्रिया दिनुहोस !
