मोरङमा रास्वपाको अप्रत्याशित ‘उछाल’, दुई क्षेत्रमा जित र चारमा फराकिलो अग्रता

विराटनगर : प्रतिनिधिसभा निर्वाचनको मतगणना चलिरहँदा मोरङ जिल्लामा राष्ट्रिय स्वतन्त्र पार्टी (रास्वपा) ले उल्लेखनीय र अप्रत्याशित प्रदर्शन गरिरहेको छ । 

जिल्लाका छ वटा प्रतिनिधिसभा निर्वाचन क्षेत्रमध्ये रास्वपाले दुई क्षेत्रमा स्पष्ट जित हात पारिसकेको छ भने बाँकी चार क्षेत्रमा पनि ठूलो मतान्तरसहित अग्रता कायम गर्दै परम्परागत ठूला दललाई चुनौती दिएको छ । अहिलेसम्म सार्वजनिक मतपरिणाम अनुसार मोरङ–४ र मोरङ–६ मा रास्वपाका उम्मेदवार विजयी भइसकेका छन् । 

मोरङ–४ बाट रास्वपाका सन्तोष राजवंशी भारी मतान्तरसहित निर्वाचित भए । उनले ४० हजार ८ सय ३३ मत प्राप्त गर्दै नेपाली कांग्रेसका महामन्त्री गुरुराज घिमिरेलाई पराजित गरेका हुन् । घिमिरेले १२ हजार ८ सय १८ मत मात्रै पाएका छन् । दुवैबीचको मतान्तर २८ हजार १५ रहेको छ ।

राजनीतिमा लामो समयदेखि सक्रिय, वैचारिक र अनुभवी नेताका रूपमा चिनिने घिमिरेलाई राजनीतिमा अपेक्षाकृत नयाँ अनुहार मानिएका राजवंशीले अत्यन्त ठूलो मतान्तरले हराएपछि यो परिणामलाई धेरैले चासोका साथ हेरिरहेका छन् । यस क्षेत्रमा तेस्रो स्थानमा रहेका नेकपा (माओवादी केन्द्र) का अमनलाल मोदीले १० हजार ७ सय ६२ मत प्राप्त गरेका छन् भने एमालेका केन्द्रीय सदस्य जीवन घिमिरे ६ हजार ९ सय ३३ मतमै सीमित भएका छन् । घिमिरेले आवश्यक मत नपाउँदा उनको जमानत समेत जफत भएको छ ।

मोरङ–६ मा पनि रास्वपाले अझ ठूलो मतान्तरसहित विजय हासिल गरेको छ । यस क्षेत्रमा रास्वपाकी उम्मेदवार रुविना आचार्यले ५५ हजार ५ सय १३ मत ल्याएर निर्वाचित भएकी छन् । उनका निकटतम प्रतिद्वन्द्वी नेपाली कांग्रेसका प्रभावशाली नेता डा. शेखर कोइराला १२ हजार ८ सय ५० मतमा सीमित भएका छन् । आचार्य र कोइरालाबीचको मतान्तर ४२ हजार ६ सय ६३ पुगेको छ ।

राजनीतिमा नयाँ अनुहारका रूपमा चिनिएकी आचार्यले नेपाली कांग्रेसका वरिष्ठ नेता कोइरालालाई यति ठूलो मतान्तरले पराजित गर्नु मोरङको राजनीतिक परिदृश्यमा ठूलो घटनाका रूपमा हेरिएको छ । यस क्षेत्रमा एमालेका विनोद ढकालले ८ हजार ३ सय १७ मत पाएका छन् भने श्रम संस्कृति पार्टीका मातृका पौडेलले ३ हजार ४ सय मत प्राप्त गरेका छन् । ढकाल र पौडेल दुवैको जमानत जोगिन सकेन ।

मोरङका अन्य चार क्षेत्रमा भने मतगणना जारी रहेको छ । तर, प्रारम्भिक परिणामले ती क्षेत्रमा पनि रास्वपाका उम्मेदवारले उल्लेखनीय अग्रता बनाइरहेका छन् । मोरङ–१ मा रास्वपाका उम्मेदवार यज्ञमणि न्यौपाने १७ हजार ६० मतसहित अग्रस्थानमा छन् ।

यस क्षेत्रमा श्रम संस्कृति पार्टीकी शान्ति पाख्रिन लामा १० हजार ९ सय १५ मतसहित दोस्रो स्थानमा रहेकी छन् । नेपाली कांग्रेसका खड्गबहादुर फागो ७ हजार ७ सय ८४ मतसहित तेस्रो स्थानमा छन् भने एमालेका घनश्याम खतिवडा ५ हजार ९ सय ९९ मतमा सीमित भएका छन् ।

मोरङ–२ मा पनि रास्वपाका उम्मेदवारले उल्लेखनीय अग्रता बनाएका छन् । उनी २८ हजार ५ सय ४६ मतसहित पहिलो स्थानमा छन् । एमालेका दिलिपकुमार बगडिया ११ हजार ९३ मतसहित दोस्रो स्थानमा छन् भने नेपाली कांग्रेसका नेता मिनेन्द्र रिजाल ९ हजार ७० मतसहित तेस्रो स्थानमा रहेका छन् ।

मोरङ–३ मा रास्वपाका गणेश कार्की १३ हजार ४ सय ३७ मतसहित अगाडि छन् । यस क्षेत्रमा नेपाली कांग्रेसका सुनीलकुमार शर्मा ८ हजार ९ सय ५३ मतसहित दोस्रो स्थानमा छन् । श्रम संस्कृति पार्टीका अमिर मगरले ७ हजार ३ सय मत ल्याएका छन् भने एमालेका इरनकुमार राई २ हजार ८ सय ३१ मतसहित निकै पछाडि परेका छन् ।

मोरङ–५ मा रास्वपाकी उम्मेदवार आशा झा २० हजार २ सय ७४ मतसहित अग्रस्थानमा छिन् । उनका निकटतम प्रतिस्पर्धी नेपाली कांग्रेसका फलुकुमार लालवानीले ७ हजार ६ सय ८८ मत पाएका छन् । नेकपाका शिवकुमार मण्डल ६ हजार ७ सय १२ मतसहित तेस्रो स्थानमा छन् भने जनता समाजवादी पार्टी (जसपा) नेपालका राजकुमार यादवले ६ हजार २ सय ५६ मत प्राप्त गरेका छन् । एमालेका मनोजकुमार अग्रवाल ५ हजार ९ सय ४४ मतसहित पाँचौँ स्थानमा रहेका छन् ।

मोरङ जिल्लामा रास्वपाको यस्तो प्रदर्शनले परम्परागत रूपमा बलिया मानिने नेपाली कांग्रेस, एमाले र नेकपा जस्ता दलहरूलाई गम्भीर झट्का लागेको छ । विशेषगरी लामो समयदेखि स्थापित नेताहरूलाई नयाँ अनुहारहरूले ठूलो मतान्तरले पराजित गर्नुलाई मतदाताको मनोविज्ञानमा आएको परिवर्तनका रुपमा हेरिएको छ । 

मतगणना जारी रहेकाले अन्तिम परिणाम आउन बाँकी भए पनि हालसम्मको परिणामले मोरङको राजनीतिक समीकरणमा ठूलो फेरबदल हुने देखाएको छ । रास्वपाले जिल्लाका सबै निर्वाचन क्षेत्रमा जित्ने सम्भावना बलियो बनेर गएको छ ।