उद्योग, वाणिज्य तथा आपूर्ति मन्त्रालय मातहतका कार्यालयमा बिचौलियाको प्रवेश निषेध

काठमाडौं : उद्योग, वाणिज्य तथा आपूर्ति मन्त्रालयले मातहतका कार्यालयमा बिचौलियाको प्रवेशमा कडाइ गरेको छ। सेवा प्रवाहलाई पारदर्शी र व्यवस्थित बनाउन मन्त्रालयले विभिन्न विभाग तथा कार्यालयमार्फत सेवाग्राही स्वयं वा आधिकारिक प्रतिनिधिबाट मात्रै सेवा लिनुपर्ने व्यवस्था लागू गरेको हो।

मन्त्रालयअन्तर्गतका निकायहरूले जारी गरेका सूचनाअनुसार अब उद्योग, कम्पनी, व्यवसाय वा फर्मसम्बन्धी सेवा लिन सम्बन्धित प्रतिष्ठानका सञ्चालक स्वयं उपस्थित हुनुपर्नेछ। वैकल्पिक रूपमा प्रतिष्ठानका कर्मचारी वा आधिकारिक रूपमा तोकिएका प्रतिनिधिले आफ्नो परिचय खुल्ने आधिकारिक परिचयपत्रसहित उपस्थित भएर सेवा लिन सक्नेछन्। सेवासँग असम्बन्धित व्यक्तिलाई सेवा दिन कुनै पनि कार्यालय बाध्य नहुने स्पष्ट पारिएको छ।

उद्योग विभागले त्रिपुरेश्वरस्थित कार्यालयबाट प्रवाह हुने सेवाका लागि सम्बन्धित पक्ष स्वयं वा आधिकारिक प्रतिनिधि मात्रै उपस्थित हुनुपर्ने व्यवस्था गरेको छ। विभागले बिचौलियामार्फत सेवा लिने प्रवृत्तिलाई निरुत्साहित गर्न यस्तो सूचना जारी गरेको जनाएको छ।

त्यस्तै, कम्पनी रजिस्ट्रारको कार्यालयले कम्पनी प्रशासनसम्बन्धी सेवा सीएएमआइएस प्रणालीमार्फत अनलाइनबाटै उपलब्ध गराउँदै आएकोले सामान्य अवस्थामा कार्यालयमै उपस्थित हुन आवश्यक नपर्ने जनाएको छ। तर, सनाखत, उजुरी वा गुनासोजस्ता सेवाका लागि भने कम्पनीका सञ्चालक, सचिव, कर्मचारी वा आधिकारिक प्रतिनिधि परिचयपत्रसहित उपस्थित हुनुपर्नेछ।

वाणिज्य, आपूर्ति तथा उपभोक्ता संरक्षण विभागले पनि सेवा लिन आउँदा सम्बन्धित प्रतिष्ठानका सञ्चालक वा आधिकारिक प्रतिनिधि परिचयपत्रसहित उपस्थित हुनुपर्ने व्यवस्था गरेको छ। अनाधिकृत व्यक्तिबाट सेवा प्रवाह नगर्ने स्पष्ट उल्लेख गरिएको छ।

त्यस्तै खानी तथा भूगर्भ विभागले समेत सेवा प्राप्तिका लागि सम्बन्धित पक्ष स्वयं वा आधिकारिक प्रतिनिधि मात्र उपस्थित हुनुपर्ने प्रावधान लागू गरेको छ। मन्त्रालयका यी निर्णयहरूले बिचौलियामार्फत हुने अनियमितता, ढिलासुस्ती तथा अतिरिक्त आर्थिक लेनदेन नियन्त्रणमा सहयोग पुग्ने अपेक्षा गरिएको छ।