ट्रम्पको धम्की : इरानमाथि बम वर्षा गरेर पाषाण युगमा पुर्याउनेछौं
चैत १९, २०८२ बिहीबार १०:४५:१४
अमेरिका : अमेरिकी राष्ट्रपति डोनाल्ड ट्रम्पले इरानलाई ‘पाषाण युग’ मा पुर्याई दिने धम्की दिएका छन् । राष्ट्रपति ट्रम्पले अमेरिकाले आगामी केही हप्ताभित्र इरानमाथि बमबारी गर्ने र उसलाई पाषाण युगमा पुर्याइ दिने धम्की दिएका हुन् । ट्रम्पले यस हप्ताको सुरुमा पनि इरानलाई यस्तै चेतावनी दिएका थिए ।
बिहीबार बिहान ह्वाइट हाउसमा आफ्नो सम्बोधनका क्रममा उनले भने, ‘हामी आगामी दुईदेखि तीन हप्ताभित्र उनीहरू (इरान) माथि धेरै ठूलो आक्रमण गर्न जाँदैछौं । हामी उनीहरूलाई फेरि पाषाण युगमा पुर्याउनेछौँ, जहाँ उनीहरू हुनुपर्ने हो ।’ ट्रम्पले सम्बोधनका क्रममा अमेरिका आगामी दुई–तीन हप्ताभित्र इरानबाट बाहिरिने समेत बताएका छन् । ट्रम्प प्रशासनले इरानसँगको युद्ध सुरु हुँदा नै यो संघर्ष चारदेखि छ हप्ताभन्दा बढी नलाग्ने जनाएको थियो ।
ट्रम्पले आफ्नो १९ मिनेटको सम्बोधनमा इरानविरुद्धको युद्धको उद्देश्य पूरा हुन निकै नजिक पुगेको दाबी गरे । सम्बोधनमा उनले भने, ‘हामी इजरायल र मध्यपूर्वका आफ्ना अन्य सहयोगीहरू जस्तै साउदी अरेबिया, बहराइन, कतार, कुवेत र यूएईलाई उनीहरूको सहयोगका लागि धन्यवाद दिन्छौं ।’
उनले भने, ‘पछिल्ला ४७ वर्षमा इरान वा उसका समर्थित समूहहरूले धेरै चरमपन्थी आक्रमणहरू गरेका छन् ।’ उनले इरानको नेतृत्वलाई ‘हत्यारा’ को आरोप लगाए । हालै देशभित्र भएका विरोध प्रदर्शनहरूमा भएको दमनको पनि उनले उल्लेख गरे । जसमा हजारौं नागरिक मारिएका थिए । उनले भने, ‘यस्ता नेताहरूलाई परमाणु हतियार प्राप्त गर्न अनुमति दिन सकिँदैन । म यो कहिल्यै हुन दिने छैन ।’
प्रतिक्रिया दिनुहोस !
