अमेरिकाबाट भएको युद्धविरामले इरानका कट्टरपन्थीहरूलाई किन उठाएको छ रिस ?

काठमाडौं : अमेरिकाबाट भएको युद्धविरामलाई लिएर इरानका कट्टरपन्थीहरु असन्तुष्ट देखिएका छन् । केही दिनअघि मात्रै इरानको राजधानी तेहरानलाई नियन्त्रण गर्ने इस्लामिक गणतन्त्रका कट्टरपन्थी नेताहरूले शहरको सबैभन्दा व्यस्त चोकमध्ये एकमा ठूलो ब्यानर राखेका थिए । त्यसमा लेखिएको थियो, ‘होर्मुज स्ट्रेट बन्द रहनेछ ।’

यो सन्देश इरानका नयाँ सर्वोच्च नेता मोजतबा खामेनीको आदेशको संकेत थियो, जो गत महिना नेतृत्वमा आएपछि सार्वजनिक रूपमा देखिएका छैनन् । तर अहिले, इरानले दुई हप्ताको युद्धविराममा सहमति जनाएपछि र पाकिस्तानको अनुरोधमा होर्मुज स्ट्रेट फेरि खोल्न राजी भएपछि, त्यो ब्यानर हटाउनु पर्ने हुन सक्छ ।

यस सम्पूर्ण मामिलामा पाकिस्तानले अमेरिका र इरानबीच मध्यस्थकर्ताको भूमिका खेलिरहेको छ । यो युद्धबिराम इरानले अस्थायी युद्धविरामका लागि तयार छैनौं भनिरहेका बेला आएको हो । उसले अमेरिका र इजराइलविरुद्ध चलिरहेको युद्धको स्थायी अन्त्य चाहेको थियो ।

कट्टरपन्थी समूहहरू यसबाट सन्तुष्ट छैनन् । इरानले होर्मुज स्ट्रेट बन्द गरेको र मिसाइल तथा ड्रोनमार्फत खाडी देशहरूमा ठूलो क्षति पुर्‍याउने क्षमता देखाएको कुराले उनीहरू अझ उत्साहित भएका थिए । उनीहरूको विश्वास छ कि इरानले युद्ध जारी राख्नु पर्थ्याे, किनकी अमेरिका र इजराइलविरुद्ध उसको स्थिति बलियो थियो ।