धादिङ : पृथ्वी लोकमार्ग अन्तर्गत धादिङको गजुरी क्षेत्रमा प्रहरीले विशेष अपरेसन सञ्चालन गर्दै ठूलो परिमाणमा लागुऔषध बरामद गरेको छ । आइतबार राति गरिएको विशेष चेकिङका क्रममा २८६ किलो ४०० ग्राम गाँजा र २०० ग्राम अफिमसहित दुई जनालाई पक्राउ गरिएको हो ।
जिल्ला प्रहरी कार्यालय धादिङका अनुसार आदमघाटबाट गजुरीतर्फ आउँदै गरेको बा ५ ख ७५३७ नम्बरको आइचर गाडीमा लागुऔषध ओसारपसार भइरहेको गोप्य सूचना प्राप्त भएको थियो । सोही सूचनाको आधारमा इलाका प्रहरी कार्यालय गजुरीबाट खटिएको टोलीले राति करिब १ः५० बजे गजुरी बजारस्थित सडक खण्डमा उक्त गाडी रोकेर जाँच गरेको थियो ।
प्रहरीले शंकास्पद गाडीको पछाडि भागमा खानतलासी गर्दा त्रिपालले छोपेर राखिएका ९ वटा सेता बोराहरू फेला पारेको थियो । ती बोराहरू खोल्दा ठूलो परिमाणमा गाँजा र अफिम बरामद भएको पुष्टि भएको हो ।
घटनामा संलग्न भएको आरोपमा प्रहरीले गाडी चालक निलकण्ठ नगरपालिका–८ का २२ वर्षीय अम्मर विक र सह–चालक सिद्धलेक गाउँपालिका–५ का १९ वर्षीय होमबहादुर विकलाई नियन्त्रणमा लिएको छ । साथै, लागुऔषध ओसारपसारमा प्रयोग गरिएको गाडी र ४ थान मोबाइल समेत प्रहरीले बरामद गरेको छ ।
पक्राउ परेका दुवै जनालाई हिरासतमा राखी लागुऔषध नियन्त्रण ऐन, २०३३ अन्तर्गत मुद्दा दर्ता गरिएको छ । जिल्ला प्रहरी कार्यालय धादिङका प्रहरी नायव उपरीक्षक (डीएसपी) एवम् सूचना अधिकारी प्रकाश दाहालका अनुसार बरामद गरिएको लागुऔषधको स्रोत र यसमा संलग्न मुख्य योजनाकारको पहिचानका लागि अनुसन्धान जारी रहेको छ ।
प्रतिक्रिया दिनुहोस !
