दाङ : दाङ प्रहरीले सरकारी छाप र दस्तखत प्रयोग गरी कीर्ते गर्ने गिरोहलाई पक्राउ गरेको छ । सरकारी छाप कीर्ते र चोरीका मोटरसाइकल बिक्री–वितरण गर्दै आएको आरोपमा तीन जना युवक पक्राउ परेका छन् ।
दाङको तुलसीपुर उपमहानगरपालिका–५ माछापुच्छ्रे टोलमा रहेको एक घरमा प्रहरीको टोलीले छापा मार्दा कीर्तेमा प्रयोग भइ रहेको सरकारी छाप र अन्यकागजातसहित तीन जनालाई नियन्त्रणमा लिइएको हो । गोप्य सूचनाका आधारमा इलाका प्रहरी कार्यालय तुलसीपुरबाट खटिएको प्रहरी टोलीले छापाका क्रममा संलग्न व्यक्तिहरूलाई नक्कली छाप र सवारी दर्ता किताबसहित नियन्त्रणमा लिइएको प्रहरीले जनाएको छ ।
पक्राउ पर्नेहरूमा सल्यान जिल्लाको बागचौर नगरपालिका–२ निवासी वर्ष २० का दीपक भण्डारी, वर्ष १९ का सरोज घर्ती मगर र वर्ष १९ का राजन बिष्ट रहेका छन् ।
प्रहरीले उनीहरूको साथबाट बा.प्र.०२–०४६ प ३३३२ नम्बरको मोटरसाइकलको सवारी दर्ता किताब १ थान, यातायात व्यवस्था सेवा कार्यालय वीरेन्द्रनगर, सुर्खेतको डिजिटल छाप १ थान, रा २ प ३११५ नम्बरको सवारी दर्ता किताब १ थान तथा उनीहरूले प्रयोग गर्दै आएको बागमती प्रदेश ०२–०४५ प १७३० नम्बरको यामाहा कम्पनीको मोटरसाइकल १ थान बरामद गरेको छ । पक्राउ परेकाहरूलाई लिखत सम्बन्धी कसुरमा दाङ जिल्ला अदालत, घोराहीबाट पाँच दिनको म्याद थप अनुमति लिई थप अनुसन्धान कार्य अघि बढाइएको प्रहरीले जनाएको छ ।
प्रतिक्रिया दिनुहोस !
