विदेशी पर्यटक पर्खिरहेको बन्दीपुर : आन्तरिक भीड बढ्दै, पूर्वाधार अझै अपुग

तनहुँ : तनहुँको बन्दीपुर ‘पहाडकी रानी’ का रूपमा चिनिने आकर्षक पर्यटकीय गन्तव्य हो, जहाँ प्रकृति, संस्कृति र मौलिक जीवन शैलीले पर्यटकलाई लोभ्याइरहेको छ । पछिल्लो समय यहाँ आन्तरिक पर्यटकको घुइँचो लागे पनि विदेशी पर्यटक भने अपेक्षाकृत रूपमा कम देखिन्छन् ।

बन्दीपुरमा के छैन र ? अतिथिका लागि राम्रो खाने बस्ने व्यवस्था, एकै ठाउँमा मिलेर बसेको पुरानो बस्ती वरपरका हरियाली डाँडाकाँडाले यहाँ पुग्ने जो–कोहीलाई मोहित बनाउँछ । यहाँ सञ्चालित होमस्टे र स्थानीय कला–संस्कृति थप आकर्षणका केन्द्र हुन् । मौलिक पहिरनले बन्दीपुरलाई छुट्टै पहिचान दिएको छ । पर्यटकका लागि आवश्यक सबै सेवा–सुविधा उपलब्ध भएकै कारण पछिल्ला दिनहरूमा बन्दीपुरमा पर्यटकको संख्या दिन प्रतिदिन बढ्दै गएको छ । त्यसमा पनि आन्तरिक पर्यटकको त घुइँचो नै लाग्ने गरेको छ । विशेष गरी शुक्रबार, शनिबार, आइतबार वा बिदाको समयमा यहाँ आन्तरिक पर्यटक खचाखच हुने गरेका छन् ।

आन्तरिक पर्यटक अपेक्षाअनुसार पुगे पनि विदेशी पर्यटक भने अपेक्षाकृत रूपमा आउन सकेका छैनन् । स्वयं आन्तरिक पर्यटकहरूले नै बाह्य पर्यटक बढीभन्दा बढी भित्र्याउन सरकारको पहल आवश्यक रहेको सुझाव दिएका छन् । यहाँ यातायातको सहज व्यवस्था नहुँदा पर्यटकले केही सास्ती भोग्नुपरेको छ । कम्तिमा डुम्रेदेखि बन्दीपुरसम्म नियमित बस सेवा सञ्चालन गर्न सके पर्यटकको संख्या अझै बढ्ने आन्तरिक पर्यटक विकास क्षेत्री बताउँछन् ।

सरकारले यहाँको नेवारी, गुरुङलगायतका जातजातिको भेषभूषा झल्किने कला–संस्कृतिको प्रवर्द्धनका लागि संग्रहालय वा यस्तै संरचना निर्माणमा ध्यान दिनुपर्ने आन्तरिक पर्यटक सुजता क्षेत्री बताउँछिन् । बन्दीपुरमा पर्यटकको संख्या बढाउन केन्द्र सरकारले बजेट विनियोजन गर्नुपर्ने पार्क निर्माण गर्नुपर्ने लगायतका भौतिक पूर्वाधारमा ध्यान दिनुपर्ने आन्तरिक पर्यटक मनोज राना मगरको सुझाव छ ।

आवश्यक भौतिक पूर्वाधार अभावकै कारण आफूहरूले सडकमै कला–संस्कृति प्रदर्शन गर्न बाध्य भएको होमस्टे सञ्चालकहरू बताउँछन् । आफ्नै पहलमा जग्गा लिएको भए पनि बजेट अभावले भवन निर्माण गर्न कठिन भएको बन्दीपुर सामुदायिक होमस्टेका सचिव माया सुनारले बताइन् । सांस्कृतिक भवन निर्माणका लागि बजेट अभाव नभए पनि उपयुक्त स्थानमा जग्गा नहुँदा काम अघि बढ्न नसकेको बन्दीपुर गाउँपालिकाका अध्यक्ष सुरेन्द्रबहादुर थापाको भनाइ छ ।

अर्कोतर्फ राति १० बजे नै होटल व्यवसाय बन्द गर्नुपर्ने र नाचगानका कार्यक्रम सञ्चालनमा प्रतिबन्ध हुँदा पर्यटक अनुभवमा असर परेको व्यवसायीहरू बताउँछन् । यसलाई मध्यनजर गर्दै समयावधि ११ देखि १२ बजेसम्म बढाउने तयारी भइरहेको गाउँपालिकाको भनाइ छ । पछिल्लो समय आन्तरिक पर्यटकको अत्यधिक भीड बढेसँगै आवश्यक भौतिक पूर्वाधारमा कमी महसुस हुन थालेको छ । सम्भावना बोकेको बन्दीपुरमा पूर्वाधार विकास र प्रभावकारी प्रवर्द्धन गर्न सके यो गन्तव्य विदेशी पर्यटकको पनि रोजाइ बन्न सक्ने देखिन्छ ।