स्याङ्जा : स्याङ्जाको कफीको बीउ अन्तरीक्ष पुगेर फर्केको छ । कफीका लागि प्रसिद्धी कमाएको स्याङ्जाको कफी अन्तरीक्षमा पुगेर पुनः पृथ्वी अर्थात् स्याङ्जा आइपुगेको छ । पुतलीबजार नगरपालिका–११ मायाटारीका बोधराज अर्यालको ‘फार्मस प्यासन’ ब्राण्डको कफीको बीउ अन्तरीक्ष पुगेको थियो । अर्यालले शान्ति कफी ट्रेड कम्पनीमार्फत कफी उत्पादन तथा बजारीकरण गर्दै आएका छन् ।
स्याङ्जाबाट जापानको गोकोरो कम्पनी हुँदै ताकुसिमा युनिभर्सिटीले यहाँको कफी अनुसन्धानका लागि अन्तरीक्षमा पठाएको फार्मर प्यासनका प्रोपाइटर बोधराज अर्यालले जानकारी दिए । अर्यालले भने, ‘अन्तरीक्षको माइनस २८ दशमलब १ डिग्री सेल्सियस तापक्रममा पुगेर बीउ फर्केको छ । सोही बीउ भर्खर उमारेको छु । अन्तरीक्षमा पुगेर फर्केको बीउ पृथ्वीमा रोप्दा के कस्ता परिवर्तन आउन सक्छ भनि अनुसन्धानका लागि यसो गरिएको हो।’
रातो चेरी, पार्चमेन्ट र ग्रीनबीनगरी ३ वटा प्याकेटमा २० ग्राम कफीको बीउले अन्तरीक्षको यात्रा गरेको हो । पार्चमेन्ट कफीको बीउ उमारेको छ भने रातो चेरी र ग्रीनबीनलाई प्रदर्शनीका रुपमा राखिने भएको छ । पृथ्वीबाट २७ किलोमिटरमाथि यात्रा ३ घण्टा अन्तरीक्षमा अडिएपछि पुनः फर्केको अर्यालको भनाई छ । हाइट्रोजन बेलुनमार्फत कफी पठाइएको थियो ।
अन्तरीक्षको गुरुत्वाकर्षण कम हुने अवस्थामा र यहाँको फरक वातावरणका कारण बीउको संरचना, विकास प्रक्रियामा परिवर्तन आउन सक्ने अर्यालको अनुमान छ । यस्ता बीउ पृथ्वीमा रोप्दा कहिलेकाहीँ बोटको वृद्धि, स्वाद र उत्पादनमा फरक विशेषता देखिन सक्छ वा सक्दैन अनुसन्धानको महत्वपूर्ण पाटो रहेको जापानी इन्जिनियर ईके सीमाको भनाई छ ।
इन्जिनियर सीमाले भने, ‘स्याङ्जाको कफीको बीउसँगै हामीले अन्य सामाग्री पनि पठाएका थियौं ।’ सीमा लामो समयदेखि स्याङ्जामा बसेर कफीका बारेमा अनुसन्धान गर्दै आएका छन् । अन्तरीक्षमा पुगेको बीउ अर्याल परिवारले उत्पादन गरेका हुन् । सो बीउ ६० दिनभित्र उम्रन्छ । अर्को बर्ष यी बिरुवालाई छुट्टै बगैंचा बनाएर रोप्ने तयारीमा भइरहेको छ ।
अर्यालले बर्षेनी हजार किलोसम्म कफी जापान पठाउने गर्दछन् । आफ्नै उत्पादन तथा खरिद गरी उनले बिगत १०÷१२ बर्षदेखि जापानमा कफी निर्यात गर्दै आएका छन् । स्याङ्जामा बर्षेनी झण्डै ३० हजार किलो कफी उत्पादन हुने गर्दछ । कफीका लागि स्याङ्जाका ११ वटै पालिका उपयुक्त मानिएका छन् । यहाँ कफीबाटै राम्रो आम्दानी गर्ने किसानहरु धेरै छन् । यहाँको कफी जापानदेखि अमेरिकासम्म निर्यात हुने गर्दछ ।
प्रतिक्रिया दिनुहोस !
