एक दशकभन्दा लामो समयदेखि टेबुलटेनिसमा सक्रिय रहँदै आएकी दीक्षाको खेलयात्रा राष्ट्रिय तथा अन्तर्राष्ट्रिय क्षेत्रमा समेत फैलिसकेको छ ।
दीक्षा दाहाल, यो नाम पछिल्लो समय नेपाली टेबुलटेनिस खेलमा चर्चामा छ । महिला टेबुलटेनिसकी उदयीमान खेलाडी दीक्षाले विभिन्न राष्ट्रिय तथा अन्तर्राष्ट्रिय प्रतियोगितामा आफूलाई प्रमाणित पनि गर्दै आएकी छन् । विगत एक दशकभन्दा लामो समयदेखि टेबुलटेनिसमा सक्रिय रहँदै आएकी दीक्षाको खेलयात्रा राष्ट्रिय तथा अन्तर्राष्ट्रिय क्षेत्रमा समेत फैलिसकेको छ ।
धरानबाट सुरु भएको यात्रा
धरान उपमहानगरपालिका–१० कलेज रोडको छेउमा एउटा टेबुलटेनिस हल छ । दीक्षा त्यही हलको अगाडिपट्टि बस्थिन् । टेबुलटेनिस हलमा दिनहुँ मानिसको चहलपहल भइरहन्थ्यो । त्यहाँ हुने खेल हेरेर धेरैले रमाइलो पनि मान्थे । दिनहुँको भिडभाड र होहल्लाले दीक्षालाई पनि आकर्षित गर्यो ।
उनी अरूले खेलेको हेरेर रमाइलो मान्थिन् । मानिस नभएको समयमा उनी साथीहरूसँग टेबुलटेनिस पनि खेल्थिन् । विस्तारै उनलाई टेबुलटेनिसले आकर्षित गर्यो । पहिले केही समयका लागि हलमा पस्ने दीक्षाको अधिकांश समय टेबुलटेनिस खेलेरै बित्न थाल्यो । टेबुलटेनिसमा भुल्न थालेपछि परिवारले रोक्न पनि खोजेको थियो । तर, उनको मनमस्तिस्कमा टेबुलटेनिस बसिसकेको थियो ।
त्यसैले परिवारले जति गरे पनि दीक्षालाई त्यसबाट टाढा राख्न सकेनन् । त्यही बेला विराटनगरमा बृहत् प्रतियोगिता आयोजना भयो । दीक्षा धरानको टिममा पर्न सफल भइन् । सो प्रतियोगितामा दीक्षा सम्मिलित धरानले तेस्रो स्थान हात पार्न सफल भयो । त्यसपछि भने उनलाई परिवारबाट रोकतोक भएन । उनले निष्फिक्री रुपमा खोल्न पाइन् । परिवारलाई मनाउन प्रशिक्षक विनोद शाक्यले पनि निकै मेहनत गरेका थिए ।
पेरिस ओलम्पिक छनोटको प्रारम्भिक टोलीमा
दीक्षा सन् २०२४ को पेरिस ओलम्पिकका लागि नेपालमै आयोजना भएको छनोट प्रतियोगिताका लागि नेपाल टेबुलटेनिस संघले छनोट गरेको प्रारम्भिक टोलीमा परेकी थिइन् । तर, उनी छनोट चरण पार गर्न असफल भइन् । ‘अन्तिम टोलीमा स्थान बनाउन निकै मेहनत गरेको थिएँ । तर, टोलीमा अटाउन सकिनँ’, दीक्षा भन्छिन्, ‘मेहनत गरेर पनि भाग्यले साथ नदिँदा निरास हुनु पर्यो ।’
इन्टरटेनमेन्ट प्रतियोगिता जितेपछि चर्चाको शिखरमा
गत चैत ७ मा सातौं संस्करणको इन्टरटेनमेन्ट टेबुलटेनिस प्रतियोगिताको उपाधि जितेपछि दीक्षाको चर्चा थप चुलिएको थियो । महेश श्रेष्ठ र रनोजमान थकुसँग दीक्षाले यो प्रतियोगिताको उपाधि जितेकी थिइन् । राष्ट्रिय खेलाडी विपुल महर्जन, एलेन महर्जन र रवि धाख्वाको टिमलाई पराजित गर्दै दीक्षा, महेश र रनोजमानको टिमले उपाधि जितेको थियो । प्रतियोगितामा पहिलो स्थान हात परेको दीक्षा दाहालको टिमले थाइल्यान्ड भ्रमणको पुरस्कार पाएको थियो ।
राष्ट्रिय तथा अन्तर्राष्ट्रिय प्रतियोगितामा अब्बल
दीक्षाले केही अन्तर्राष्ट्रिय र थुप्रै राष्ट्रिय प्रतियोगितामा आफूलाई अब्बल सावित गरिसकेकी छन् । सन् २०१६ मा पाकिस्तानको कराँचीमा आयोजना भएको दक्षिण एसियाली जुनियर तथा क्याडेट टेबुलटेनिस च्याम्पियनसिपमा एक रजत र एक कांस्य पदक जितेकी उनले सन् २०१९ मा भारतको कालिम्पोङमा भएको प्रतियोगिताको महिला डबल्समा रजत पदक जितेकी थिइन् ।
यस्तै २०६८ मा धनगढीमा आयोजना भएको छैटौं राष्ट्रिय खेलकुद प्रतियोगितामा कांस्य पदक जितेकी उनले २०७३ मा पूर्वाञ्चलमा भएको सातौं राष्ट्रिय खेलकुदमा रजत पदक हात पारिन् । आठौं राष्ट्रिय खेलकुदमा पनि उनले कांस्य पदक जित्न सफल भइन् । यससँगै थुप्रै उमेर समूह तथा राष्ट्रिय प्रतियोगितामा आफूलाई अब्बल सावित गर्दै आएकी छन् । हालै सम्पन्न अल नेपा वडा च्याम्पियनसिपमा पनि उनले तेस्रो स्थान हासिल गरेकी थिइन् ।
बालबालिकालाई सिकाउँछिन् टेबुलटेनिस
धरानको सानो टेबुलटेनिस हलबाट सुरु भएको उनको यात्रा अहिले निकै विस्तार भइसकेको छ । दीक्षा आफू प्रशिक्षण गर्नुका साथै विद्यालयका बालबालिकालाई पनि प्रशिक्षण गराउँदै आएकी छन् । पछिल्लो समय दीक्षाले नेपालटारमा रहेको बालवाटिका विद्यार्थीलाई टेबुलटेनिस सिकाउँदै आएकी छन् ।
दीक्षा आफूले सकुञ्जेलसम्म टेबुलटेनिसमै सक्रिय रहने बताउँछिन् । ‘आफूले सकुञ्जेलसम्म टेबुलटेनिसमै सक्रिय हुन्छु’, दीक्षा भन्छिन्, ‘अब केही वर्ष खेल्छु । नेपालको नम्बर एक खेलाडी बन्ने र ओलम्पिकमा खेल्ने लक्ष्य छ । त्यसपछि भने प्रशिक्षणमा सक्रिय हुन्छु ।’
प्रतिक्रिया दिनुहोस !
