भारतीय एम्बुलेन्स प्रयोग गरेर नेपालमा गाँजा तस्करी, २ जना पक्राउ
वैशाख २२, २०८३ मंगलबार २१:५२:५८
सुनसरी : सुनसरीको बराहक्षेत्र नगरपालिका–२ पुल्ठेगौडामा भारतीय नम्बर प्लेटको एम्बुलेन्सबाट ठूलो परिमाणमा गाँजा बरामद भएको छ।
मंगलबार साँझ करिब ५ बजे चतराको तेह्रआर्डी सडक खण्डमा इलाका प्रहरी कार्यालय चतराबाट खटिएको प्रहरी गस्ती टोलीले नियमित चेकजाँचका क्रममा १४८ केजी गाँजासहित दुई जना भारतीयलाई पक्राउ गरेको हो।
बिआर ०७ पिसि ४७६५ नम्बरको एम्बुलेन्स प्रहरीले देख्नासाथ भाग्न खोजेपछि शंका लागेर पछ्याई नियन्त्रणमा लिइएको सुनसरीका प्रहरी प्रमुख एसपी केशवकुमार थेबेले बताए।
प्रहरीले एम्बुलेन्स चालक भारतको बिहार राज्य स्थित सुपोल जिल्ला बिरपुर बस्ने १८ वर्षीय धर्मेन्द्र कुमार यादव र सोही एम्बुलेन्समा सवार २१ वर्षीय मो. सदामलाई नियन्त्रणमा लिएको एसपी थेबेले बताए।
बरामद गाँजा र सवारी साधनसहित उनीहरूलाई इलाका प्रहरी कार्यालय महेन्द्रनगरमा राखेर थप अनुसन्धान भइरहेको प्रहरी निरीक्षक दिवस कुँवरले बताए। एम्बुलेन्सजस्तो अत्यावश्यक सेवाका सवारी साधन दुरुपयोग गरी लागूऔषध ओसारपसार गर्ने प्रवृत्ति बढ्दै गएको भन्दै यसलाई गम्भीर रूपमा लिएर अनुसन्धान अगाडि बढाइएको उनले बताए।
प्रतिक्रिया दिनुहोस !
