ओखलढुङ्गा : विश्वको सर्वोच्च शिखर सगरमाथा आरोहणका लागि यस वर्षको बाटो पूर्णरूपमा खुलेको छ । पर्वतारोहण सञ्चालक संघको अगुवाइमा खटिएका दक्ष शेर्पाहरूको टोलीले चुचुरोसम्मै डोरी टाँग्ने (रोप फिक्सिङ) कार्य सफलतापूर्वक सम्पन्न गरेसँगै आरोहणको औपचारिक ढोका खुलेको हो ।
पीक प्रमोशनका सम्पर्क अधिकृत तथा अनुभवी हिमाल आरोही आङ्बाबु शेर्पाका अनुसार डोरी टाँग्ने काम सकिएसँगै अब आरोहीहरूका लागि शिखरसम्म पुग्ने बाटो सुरक्षित भएको छ । ‘बाटो खुलेको खबरले आधार शिविरमा रहेका आरोहीहरूमा निकै उत्साह थपिएको छ’, शेर्पाले भने । बुधबार १० बज्दा बाटो खुलेको जानकारी आएको उनको भनाई छ । पर्यटन विभागले भने यसको आधिकारिक पुष्टी गरिसकेको छैन ।
४०० बढीको अनुमति, क्याम्पहरूमा बढ्दो चहलपहल
हाल अधिकांश आरोहीहरू आधार शिविर र क्याम्प २ को आसपासमा रहेर मौसम अनुकूल हुने प्रतिक्षा गरिरहेका छन् । बाटो खुलेसँगै अब अनुकूल मौसमको छाँटकाँट हेरी आरोहीहरू पालैपालो चुचुरोतर्फ प्रस्थान गर्ने तयारीमा जुटेका छन् । यस वर्ष नेपालतर्फको दक्षिण मोहडाबाट आरोहण गर्नेहरूको संख्या उल्लेख्य रहेको छ ।
प्रतिक्रिया दिनुहोस !
