संसद वैठक १५ मिनेटका लागि स्थगित
प्रधानमन्त्री उपस्थित हुने–नहुने कुराले विपक्षीले संसदमा हलो अड्काउन पाइँदैन : जगदीश खरेल
जेठ १२, २०८३ मंगलबार १५:३२:२६
काठमाडौं : सत्तारुढ राष्ट्रिय स्वतन्त्र पार्टी (रास्वपा) सांसद जगदीश खरेलले प्रधानमन्त्री उपस्थित हुने वा नहुने कुरामा विपक्षीले संसदमा हलो अड्काउन नहुने बताएका छन् ।
प्रतिनिधिसभाको आजको वैठकमा बोल्दै रास्वपा सांसद खरेलले आठ वटा अध्यादेश सरकारले संसदमा किन ल्याउनु पर्यो भनेर आज महसुस भइरहेको बताएका छन् । उनले संसद विपक्षीको अवरोधकै कारण २०७ सालमा बनेको संविधान अनुसार जति ऐन र कानुन संसदले बनाउनु पर्थ्याे त्यो नसकेको बताए ।
उनले उनले सदनमा विपक्षी दलहरुको विरोधलाई देखाउँदै भने, ‘यतिधेरै ऐन–कानुन किन बन्न सकेनछ भन्ने कुरा यो तमासाले देखाइरहेको छ ।’ विपक्षीले जुन संसदीय तामासा देखाइरहेका छन् त्यो सँधै सकारात्मक मात्र नहुने बताउँदै सांसद खरेलले जनताको पक्षमा कानुन निर्माण गर्ने पक्षमा सत्ता पक्ष र प्रतिपक्षी दलहरु त्यहि रुपमा जवाफदेही र जिम्मेवार बन्नु पर्ने बताएका छन् ।
सांसद खरेलले पर्यटनसम्बन्धी ऐन नबनेको आधा शताब्दी भइसकेको बताउँदै उनले ४८ वर्षदेखि बन्न नसकेको ऐन बनाउन आफूहरु अगाडि बढिरहेका बेला एउटा प्रधानमन्त्री उपस्थित हुने-नहुने कुराले आधा शताब्दीदेखि बन्न नसकेको यो ऐन बनाउने प्रक्रियामा विपक्षीले हलो अड्काउन नमिल्ने बताए । उनले भने, ‘संसद विपक्षीहरुले अवरोध गर्ने थलो त हो तर, कानुन बनाउने थलो पनि हो । यो स्मरण गराउन चाहन्छु ।’ सांसद खरेलको अभिव्यक्तिपछि विपक्षी दलका सांसद आक्रोशित बनेका छन् । विपक्षी दलका सांसदहरुले विरोध जनाएपछि सभामुख डोलप्रसाद (डीपी) अर्यालले १५ मिनेटका लागि वैठक स्थगित गरेका छन् ।
प्रधानमन्त्रीको उपस्थितिको माग गर्दै बिपक्षी दलका सांसदहरुले विरोध जनाएपछि प्रतिनिधिसभा बैठक अवरुद्ध भएको हो । मंगलबार बसेको बैठकमा आकस्मिक, शून्य र विशेष समय सकिएपछि सभामुख अर्यालले कार्यसूचीमा रहेका बिषयलाई अगाडि बढाउन लाग्दा बिपक्षी दलका सांसदहरुले उठेर विरोध जनाएका थिए । बिपक्षी दलका सांसदहरुले विरोध जनाएपछि सभामुख अर्यालले कांग्रेस प्रमुख सचेतक बासना थापालाई बोल्न समय दिएका थिए । कांग्रेस प्रमुख सचेतक थापाले सरकारले दुई तिहाइको दम्भ देखाएको बताइन् । उनले प्रधानमन्त्रीसँग प्रश्नोत्तर कार्यक्रममा प्रतिपक्षको माग र जनचासोका विषयलाई बेवास्ता गर्दै सञ्चालन गर्नु संसदीय मर्यादाको अभ्यास नभएको उल्लेख गरिन् ।
त्यस्तै नेकपा एमालेका प्रमुख सचेतक ऐन महरले संवैधानिक व्यवस्था, कानुनी व्यवस्था अनुसार पनि प्रधानमन्त्री सदनमा उपस्थित हुनुपर्ने भन्दै प्रधानमन्त्री नआए संसदको अवरोध नहट्ने बताए । त्यस्तै नेपाली कम्युनिस्ट पार्टीका प्रमुख सचेतक युवराज दुलालले प्रधानमन्त्रीले जनताका प्रश्नको जवाफ दिनुपर्ने बताए । उनले संख्याको दम्भ नराख्न सरकारलाई सुझाव समेत दिए । त्यस्तै अन्य बिपक्षी दलका सांसदहरुले पनि प्रधानमन्त्रीको उपस्थितिको लागि रुलिङको माग गरेका थिए ।
विरोधपछि बैठकमा सभामुख अर्यालले बिपक्षी दलले राखेका माग जायज भएको भन्दै आफू पनि निरन्तर छलफलमा रहेको बताए । उनले छिटै प्रधानमन्त्रीको उपस्थिति सदनमा हुने भएकाले सदन सञ्चालनका लागि सहयोग गर्न आग्रह गरेका थिए । विपक्षी दलका सांसदहरुले निरन्तर विरोध जनाएपछि सभामुख अर्यालले विरोधकाबीच कार्यसूचीमा रहेका कार्यक्रमलाई अघि बढाएका थिए भने बिपक्षी दलका सांसदहरुले उठेर नारावाजी गरेका थिए । पर्यटन विधेयकमाथि विचार गरियोस् भन्ने प्रस्तावमा छलफल जारी रहँदा समेत विरोध जारी रहेपछि सभामुख अर्यालले १५ मिनेटका लागि बैठक स्थगित गरेका हुन् ।
प्रतिक्रिया दिनुहोस !
