सुनसरी : खोटाङ, ओखलढुंगा र उदयपुर जिल्लालाई जोड्ने ऐतिहासिक महत्वका दुई झोलुङ्गे पुल सुनकोशी र दूधकोशी नदीको संगमस्थल ज्योर्तिघाटमा निर्माण भई सञ्चालनमा आएका छन् । पुल सञ्चालनसँगै तीन जिल्लाबीचको आवतजावत सहज हुनुका साथै पर्यटन, व्यापार र स्थानीय आर्थिक गतिविधिमा टेवा पुग्ने अपेक्षा गरिएको छ ।
खोटाङको हलेसी तुवाचुङ नगरपालिका–१ ठुलढुङ्गा, ओखलढुंगाको मानेभञ्ज्याङ गाउँपालिका–६ हिलेपानी र उदयपुरको कटारी नगरपालिका–१४ लेखानीलाई जोड्ने गरी सुनकोशी र दूधकोशीमाथि दुईवटा झोलुङ्गे पुल निर्माण गरिएको हो । हलेसी तुवाचुङ नगरपालिकाकी मेयर बिमला राईले पुल सञ्चालनमा आएपछि तीन जिल्लाका नागरिकलाई ठूलो राहत पुगेको बताइन् । उनका अनुसार पुलले पर्यटन प्रवद्र्धन, स्थानीय उत्पादनको बजारीकरण तथा आर्थिक गतिविधि विस्तारमा महत्वपूर्ण भूमिका खेल्नेछ ।
मानेभञ्ज्याङ गाउँपालिका–४ का वडाध्यक्ष विष्णु तामाङले विगतमा वर्षायाममा नदी तर्न निकै कठिन हुने गरेको उल्लेख गर्दै पुल निर्माणपछि विद्यार्थी, किसान, व्यापारी तथा सर्वसाधारणलाई प्रत्यक्ष लाभ पुगेको बताए । सस्पेन्सन ब्रिज डिभिजन, पुलचोक, ललितपुरका योजना प्रमुख शंकर बुढाथोकीका अनुसार झोलुङ्गे पुलले सुरक्षित आवागमनका साथै शिक्षा, स्वास्थ्य, कृषि तथा व्यापारिक गतिविधिमा सकारात्मक प्रभाव पार्नेछ ।
२०७९ साउन ६ गते सस्पेन्सन ब्रिज डिभिजन र निर्माण कम्पनी श्री अपर तामाकोशी-जे.के. जेभीबीच सम्झौता भई निर्माण थालिएको पुल जटिल भौगोलिक अवस्थाबीच सम्पन्न गरिएको हो । खोटाङ–ओखलढुंगा जोड्ने पुल १३४ मिटर र ओखलढुंगा–उदयपुर जोड्ने पुल १७८ मिटर लामो छ । दुवै पुलको कुल लम्बाइ ३१२ मिटर रहेको छ । करिब ३ करोड ३१ लाख रुपैयाँ लागतमा निर्माण सम्पन्न भएको राष्ट्रिय गानका रचनाकार तथा पुल निर्माणका पहलकर्ता प्रदीपकुमार राई ‘व्याकुल माईला’ ले जानकारी दिए ।
पुलको उद्घाटन खोटाङका पूर्व सांसद टंक राई र ओखलढुंगाका जिल्ला समन्वय समिति प्रमुख टेकराज भट्टराईले संयुक्त रूपमा गरेका थिए । पुल सञ्चालनमा आएपछि ज्योर्तिघाट नयाँ पर्यटकीय आकर्षणको केन्द्र बन्दै गएको छ । स्थानीयका अनुसार सुनकोशी–दूधकोशी संगम र आसपासको प्राकृतिक सौन्दर्य अवलोकन गर्न दैनिक रूपमा आन्तरिक तथा बाह्य पर्यटक पुग्न थालेका छन् । तीन जिल्लाको संगम क्षेत्रमा बनेका यी पुलले विकास, सम्भावना र सामाजिक एकताको नयाँ सेतु निर्माण गरेका छन् ।
प्रतिक्रिया दिनुहोस !
