सीमा विवाद
प्रधानमन्त्रीले कि प्रमाण देखाउनुस्, कि माफी माग्नुस् : हर्क साम्पाङ
जेठ २५, २०८३ सोमबार १३:३७:१
काठमाडौं : श्रम संस्कृति पार्टीका अध्यक्ष समेत रहेका प्रतिनिधिसभा सदस्य हर्क साम्पाङले प्रधानमन्त्री वालेन्द्र शाह (बालेन) सँग आफूले बोलेका कुराको प्रमाण देखाउन माग गरेका छन्।
प्रतिनिधिसभाको आजको बैठकमा बोल्दै सांसद साम्पाङले प्रधानमन्त्री शाह तत्काल संसदमा उपस्थित हुनुपर्ने र 'नेपालले भारतको सीमा कहाँ-कहाँ मिचेको रहेछ' भन्ने कुरा पुष्टि गर्नुपर्ने बताए। प्रधानमन्त्रीले संसदबाटै नेपालले भारतको सीमा मिचेको भन्दै दिएको अभिव्यक्ति अविलम्ब सच्याउनुपर्ने आफूहरूको माग रहेको उनले स्पष्ट पारे।
सांसद साम्पाङले भने: 'प्रधानमन्त्रीले कि त प्रमाण देखाउनु पर्यो, होइन भने आफ्नो गल्ती स्वीकार गर्दै उक्त अभिव्यक्तिप्रति माफी माग्नुपर्छ। यसका लागि प्रधानमन्त्री संसद्मा उपस्थित हुनुपर्छ।'
संसदमा यतिका दिनदेखि विरोध जारी रहँदा समेत प्रधानमन्त्रीले एउटा वक्तव्यसम्म ननिकालेको र सदनमा उपस्थित हुने छाँटकाँट समेत नदेखाएको भन्दै उनले आपत्ति जनाए। संसद्मा यस्तो गम्भीर विषयमा गतिरोध अन्त्य नभई सभामुखले कार्यसूचीमा प्रवेश गरेर छलफल अगाडि बढाउन खोज्नु स्वीकार्य नहुने साम्पाङको दाबी छ।
प्रतिक्रिया दिनुहोस !
