संसदमा रेकर्ड भइसकेको अभिव्यक्ति प्रधानमन्त्रीले संसदबाटै फिर्ता लिनु पर्छ : कांग्रेस

काठमाडौं : प्रमुख प्रतिपक्षी दल नेपाली कांग्रेस संसदीय दलका नेता समेत रहेका सांसद भिष्मराज आङदेम्बेले संसदमा रेकर्ड भइसकेको सीमासम्बन्धी प्रधानमन्त्रीको अभिव्यक्ति आफैले संसदबाट फिर्ता लिनु पर्ने बताएका छन् ।

प्रतिनिधिसभाको आजको वैठकमा बोल्दै सांसद आङदेम्बेले भारतमा ज्वाहरलाल नेहरु र नेपालमा वीपी कोइरालाले संसदका महत्वपूर्ण बैठकमा प्रधानमन्त्री उपस्थित हुनुपर्ने थिति बसालेको बताउँदै संसदमा हुने प्रधानमन्त्रीको उपस्थिति विशेष महत्वको हुनुपर्ने बताए । उनले प्रधानमन्त्री बालेन शाह जेठ १७ गतेको उपस्थिति र भूमिका एकलौटी रहेको बताए ।

उनले आफूहरुलाई भनिएपछि प्रधानमन्त्रीलाई प्रश्न सोधिएको बताउँदै सांसद आङदेम्बेले प्रधानमन्त्रीको संसदको उपस्थिति सारगर्वित हुनुपर्ने तर, प्रधानमन्त्रीको त्यस दिनको उपस्थिति त्यस्तो हुन नसकेको बताए । प्रधानमन्त्री अचानक आएको, अचानक बोलेको र नेपालले भारत सीमा मिचेको दावी नै गरेको बताए ।

उनले आफूहरुले प्रधानमन्त्रीको ‘टङ स्लिप’ भएको ठानेको बताउँदै संसदमा रेडर्क भइसकेको अभिव्यक्ति प्रधानमन्त्रीले संसदमा पुन उपस्थिति भएर सफाइ दिनुपर्छ, प्रष्ट पार्नु पर्छ भन्ने आफूहरुको अडान रहेको बताए । संसदमा आएर आफूले दिएको अभिव्यक्ति फिर्ता लिन प्रधानमन्त्रीलाई आग्रह गर्दै उनले भने, ‘यो हाम्रो माग भन्नु या अडान यहि हो ।’