बंगालमा सांसद महुआ मोइत्राको कार्यालयमा अण्डा प्रहार, भिडियो भाइरल

बंगाल : पश्चिम बंगालमा तृणमूल कांग्रेस (टीएमसी) को पराजयपछि ममता बनर्जी पक्षका नेताहरूको समस्या कम हुने संकेत देखिएको छैन । हारपछि विभिन्न टीएमसी नेतामाथि अण्डा प्रहारका घटनाहरू भइरहेका छन्, जसको विषय अदालतसम्म पुगेको छ । यसैक्रममा बुधबार टीएमसी सांसद महुआ मोइत्राको बंगालस्थित कार्यालयमा अण्डा प्रहार गरिएको छ । घटनाका बेला महुआ कार्यालयभित्रै थिइन् । उनले यस आक्रमणको पछाडि भारतीय जनता पार्टी (भाजपा) को हात रहेको आरोप लगाएकी छन् ।

महुआले सामाजिक सञ्जाल एक्समा भिडियो सार्वजनिक गर्दै भनिन्, ‘गत एक घण्टादेखि भीड यहाँ जम्मा भएर अण्डा र तरकारी फ्याँकिरहेको छ, तर प्रहरी र सीआरपीएफ हेरेर मात्र बसेका छन् ।’ उनले सार्वजनिक गरेको भिडियोमा कार्यालय बाहिर ठूलो भीड जम्मा भएको देखिन्छ । उनीहरूको हातमा अण्डा, तरकारी र कालो झण्डा रहेको छ । भिडले लगातार कार्यालयतर्फ अण्डा र अन्य सामग्री प्रहार गरिरहेको देखिन्छ । भिडियोमा महुआले भनिन्, ‘हेर्नुहोस्, यहाँ के भइरहेको छ । प्रहरी केवल हेरेर बसेको छ । यो भाजपाको भीड हो । मैले डीजीपीलाई फोन गरेँ, तर प्रहरी र सीआरपीएफ दुवैले केही गरेका छैनन । म यही क्षेत्रकी सांसद हुँ र अहिले कार्यालयभित्रै छु ।’

कुणाल घोषमाथि पनि भएको थियो अण्डा प्रहार

यसअघि जुन १६ मा टीएमसी नेता कुणाल घोषमाथि पनि अण्डा प्रहार गरिएको थियो । उनी सञ्चारकर्मीसँग कुरा गरिरहेका बेला एक युवकले उनको टाउकोमा अण्डा हानेका थिए । घोषले पनि उक्त घटनामा भाजपालाई जिम्मेवार ठहराएका थिए । त्यसैगरी उदयन गुहा, सुजय हाजरा, बप्पादित्य दासगुप्ता लगायतका टीएमसी नेतामाथि पनि यस्तै प्रकारका आक्रमण भइसकेका छन् । टीएमसीले यी सबै घटनाको दोष भाजपालाई दिँदै आएको छ भने भाजपाले भने यो स्थानीय जनताको आक्रोश भएको दाबी गर्दै आएको छ ।

अभिषेक बनर्जी पनि बनेका थिए निशाना
बंगालमा पराजयपछि भएको हिंसाका पीडितलाई भेट्न सोनारपुर पुगेका ममता बनर्जीका भतिजा तथा टीएमसी सांसद अभिषेक बनर्जीमाथि पनि भीडले अण्डा, ढुंगा र चप्पल प्रहार गरेको थियो । अभिषेकले आफूलाई ज्यान मार्ने प्रयास भएको आरोप लगाएका थिए । उनले प्रहरीको हेल्मेट लगाएर आफूलाई सुरक्षित राखेका थिए । यसअघि मदन मित्रा र सौमित्र बनर्जीमाथि पनि अण्डा प्रहारका घटना भइसकेका छन् । 

हालै पश्चिम बंगालका विद्यालयको मिड डे मिल (दिउँसोको खाजा) बाट अण्डा हटाइएको विषयमा पनि महुआ मोइत्राले आपत्ति जनाएकी थिइन् । उनले बंगालका बालबालिकाले सोयाबिन भन्दा अण्डा बढी रुचाउने बताउँदै अण्डा उच्चस्तरीय प्रोटिनको स्रोत भएको उल्लेख गरेकी थिइन् । कोलकाता नगर निगमका विद्यालयमा मिड डे मिल उपलब्ध गराउने जिम्मेवारी इस्कोनलाई दिइएको छ ।

नयाँ व्यवस्थाअनुसार विद्यार्थीलाई अण्डाको सट्टा पनिर, सोया, राजमा, दाल र दूध जस्ता शाकाहारी विकल्प उपलब्ध गराइनेछ । महुआले यस विषयमा प्रश्न उठाउँदै भनिन्, ‘अण्डा उत्कृष्ट गुणस्तरको प्रोटिन हो । सोया पनि राम्रो वनस्पति प्रोटिन हो, तर बालबालिकाले त्यसलाई खासै मन पराउँदैनन् । यदि यो सांस्कृतिक कारणले शाकाहारी भोजनलाई प्राथमिकता दिने प्रयास होइन भने यसको कारण के हो ?’