वीरेन्द्रनगर : दैलेखको चामुण्डाबिन्द्रासैनी नगरपालिका–७ अन्तर्गत कर्णाली राजमार्गको साङ्गेतडामा फोर्स गाडी कर्णालीमा खसेको छ । सुर्खेतबाट कालिकोटको रास्कोटतर्फ जाँदै गरेको क.प्र. ०२–००१ ख १०५५ नम्बरको फोर्स गाडी शुक्रबार बिहान करिब ११:३० बजे दुर्घटनामा परी कर्णाली नदीमा खसेको हो।
दुर्घटनाबारे टेलिफोनमार्फत सूचना प्राप्त हुनासाथ उद्धार सामग्रीसहित प्रहरी निरीक्षकको नेतृत्वमा प्रहरी टोली घटनास्थलतर्फ परिचालन भएको छ । प्रारम्भिक जानकारीअनुसार गाडी सडकबाट करिब ४०० मिटर तल खसेर कर्णाली नदीमा बेपत्ता भएको प्रहरीले जनाएको छ ।
उद्धारका क्रममा हालसम्म नाम,थर र वतन खुल्न नसकेका एक जना पुरुषलाई फेला पारिएको छ । उनलाई नदीबाट उद्धार गरी सडकतर्फ ल्याउने कार्य भइरहेको जिल्ला प्रहरी कार्यालय दैलेखले जनाएको छ।
घटनास्थलमा उद्धार सामग्रीसहित ३५ जना प्रहरी परिचालन भई तीव्र रूपमा उद्धार कार्य सञ्चालन भइरहेको छ । दुर्घटनास्थल प्रहरी चौकी पाल्तडाबाट करिब ३ किलोमिटर तथा जिल्ला प्रहरी कार्यालय दैलेखबाट करिब ५० किलोमिटर पश्चिममा पर्दछ ।
दुर्घटनाको कारण,गाडीमा सवार यात्रुको संख्या तथा मानवीय क्षतिको यकिन विवरण आउन बाँकी रहेको प्रहरीले जनाएको छ। घटनाबारे थप विवरण प्राप्त भएपछि सार्वजनिक गरिने जनाइएको छ।
प्रतिक्रिया दिनुहोस !
