इरानी सर्वोच्च नेता खामेनीको अमेरिकालाई चेतावनी : कहिले नभुल्ने पाठ सिकाउने छौं

इरान : इरानका सर्वोच्च नेता मोजतबा खामेनीले अमेरिकी राष्ट्रपतिको हस्ताक्षरको कुनै महत्व र विश्वसनीयता नरहेको बताएका छन् । इरानको सरकारी टेलिभिजनबाट प्रसारित एक कार्यक्रममा सञ्चालकले सर्वोच्च नेता मोजतबा खामेनीसँग सम्बन्धित नयाँ लिखित सन्देश पढेर सुनाएका छन् ।

उक्त सन्देशमा अमेरिकालाई ‘कहिल्यै नभुल्ने गरी पाठ सिकाइने’ चेतावनी दिइएको छ । सन्देशमा भनिएको छ, ‘सम्झौताको उल्लंघनले फेरि एक पटक अमेरिकी राष्ट्रपतिको हस्ताक्षरको कुनै महत्व वा विश्वसनीयता नरहेको प्रमाणित गरेको छ ।’ लिखित सन्देशमा थप भनिएको छ, ‘अमेरिकाले फेरि एक पटक संसारसामु आफ्नो वास्तविक अनुहार देखाएको छ ।

उसका कदमहरूले उसका नीतिहरू झुट, अविश्वसनीय र छलपूर्ण रहेको पुष्टि गर्छन् ।’ सन्देशमा अझै भनिएको छ, ‘यदि अमेरिकाले युद्ध भड्काउने प्रयास गर्‍यो भने उसले ठूलो क्षति बेहोर्नु पर्नेछ । इरान र उसका सहयोगीहरूले अमेरिकालाई यस्तो जवाफ दिनेछन्, जसलाई उसले लामो समयसम्म सम्झिरहने छ ।’

आफ्ना पिता पछि मोजतबा खामेनी सर्वोच्च नेता बनेपछि उनी अहिलेसम्म सार्वजनिक रूपमा देखिएका छैनन् र उनले कुनै अडियो वा भिडियो सन्देश पनि जारी गरेका छैनन् । हालसम्म उनका नाममा सार्वजनिक भएका सबै सन्देश लिखित रूपमै सार्वजनिक हुँदै आएका छन् ।