काठमाडौं: नेपालले भारतलाई तेस्रो दक्षिण एसियाली मैत्रीपूर्ण फुटभली च्याम्पियनसिमा २-० ले पराजित गर्दै स्वर्ण जितेको छ ।
टोखास्थित भूतखेल मैदानमा भएको मैत्रीपूर्ण फुटभली प्रतियोगितामा नेपालले बेस्ट अफ थ्रीको खेलमा २०-१८, १८-१४ ले भारतलाई पराजित गरेको हो । बिच भलिबलजस्तै बालुवामा खेलिने यस खेलमा हातको सट्टा खुट्टा प्रयोग गरिन्छ । १८ अंकमा खेल समाप्त हुने भए पनि दुई अंकको फरक अनिवार्य हुनेछ ।
विजयी खेलाडीलाई इन्डियन स्पोर्टस् अथिरिटी बोर्डका सदस्य डा. एनएम नन्द र दक्षिण एसियाली फुटभली महासंघका अध्यक्ष राम अवतारले पुरस्कार प्रदान गरे ।
दक्षिण एसियामा नौलो खेलका रूपमा रहेको फुटभली खेल ब्राजिलबाट सुरु भएको हो । उक्त खेललाई दक्षिण एसियामा विकास र विस्तार गर्ने उद्देश्यले नेपाल आएको दक्षिण एसियाली फुटभली महासंघका प्रतिनिधि तथा भारतीय फुटभली संघको टोलीले नेपालमा मैत्रीपूर्ण खेल आयोजना गरेको हो ।
नेपालले यसअघि च्याम्पियनसिपका रूपमा २०७२ सालमा दक्षिण एसियाली फुटभली आयोजना गरिसकेको छ । थाइल्यान्डमा गत वैशाख ३० देखि आयोजना भएको एसियाली फुटभली च्याम्पियनसिपमा सहभागिता जनाइसकेको नेपाल फुटभली संघका अध्यक्ष मनीष ‘राम' जोशीले बताए ।
प्रतिक्रिया दिनुहोस !
