अब हामी सरकार बनाउछौँ: महरा
काठमाडौँ: एमाले नेतृत्वको सरकारको समर्थन फिर्ता लिएलगत्तै माओवादी केन्द्रले सरकार बनाउने भएको छ।
एमाले अध्यक्ष केपी शर्मा ओली नेतृत्वको सरकारको समर्थन फिर्ता लिए लगत्तै कुरा गर्दै माओवादी नेता कृष्णबहादुर महराले भने, ‘अब हामी सरकार बनाउछौँ।'
महराले कांग्रेसले माओवादी नेतृत्वमा बन्ने सरकारलाई समर्थन गर्ने विश्वास लिएको समेत बताए। यस विषयमा छलफल हुन बाँकी नै भए पनि कांग्रेसले समर्थन गर्नेमा आफूहरु विश्वास्त रहेको महराको भनाइ छ।
महराले भने, ‘कांग्रेसँग छलफल हुन सकेको छैन तर कांग्रेसले माओवादी नेतृत्वको सरकारलाई साथ दिन्छ। यो विषयमा अब कांग्रेससँग छलफल हुन्छ।'
महराले ओली नेतृत्वको सरकारले मधेस आन्दोलन, भूकम्पपछिको पुननिर्माणको विषयमा सोचेजस्तो काम गर्न नसकेको समेत आरोप लगाए।
माओवादीसँग भएका सम्झौता कार्यान्वयन नभएपछि माओवादी सरकारबाट बाहिरिएको महराले बताए।
‘सहमति कार्यान्वयन नभएपछि हामी सरकारबाट अलग हुन बाध्य भयौँ,' महराले भने।
प्रतिक्रिया दिनुहोस !
