डढेलोले ८२ हजार अमेरिकी विस्थापित

लस एन्जल्सः जंगलमा लागेको डढेलोका कारण क्यालिफोर्नियाको सान बर्नार्डिनो जिल्लामा ८२ हजार अमेरिकी घर छोडी सुरक्षित स्थलतर्फ भाग्न बाध्य भएका छन् । जंगलमा लागेको आगोको मुस्लो करिब ८० फिट माथिसम्म दन्किन थालेपछि त्यस क्षेत्रमा बसोवास गर्ने मानिस जीवन रक्षाका लागि घर छाडी सुरक्षित स्थलतर्फ भागेका हुन् ।

समाचार संस्था सिन्ह्वाका अनुसार मंगलबार जंगलमा आगो लाग्न सुरु भएको थियो । गर्मी मौसम, सुखा हावा र घना जंगलका कारण तीव्र गतिमा डढेलो लागेको हो । यस डढेलोलाई ‘ब्लुकट’ नाम दिइएको छ । सुरुमा पाँच एकडमा लागेको उक्त डढेलो नौ हजार एकडमा फैलिएको छ ।

डढेलो लागेका भिडियो सार्वजनिक सञ्जालमा सेयर गरिएका छन् । क्यालिफोर्नियाका गभर्नर जेरी ब्राउनले सान बर्नार्डिनोमा संकटकाल घोषणा गरेका छन् । डढेलो नियन्त्रण गर्न सात सयभन्दा बढी अग्निनियन्त्रक खटिएका छन् । डढेलोबाट पाँचजना जलेको अग्निनियन्त्रकले बताएका छन् ।

उनीहरूलाई उपचारार्थ अस्पताल भर्ना गरिएको छ । आगलागीबाट कति घर जलेर ध्वस्त भए भन्ने तथ्यांक नआइसके पनि दर्जनौ घर खरानीमा परिणत भएका स्थानीय बासिन्दाले बताएका छन् । स्थानीय बासिन्दा ५१ वर्षीय डारेन डाल्टनले भने, ‘यति छिटो आगो लाग्यो, कल्पना गर्न पनि कठिन हुन्छ । अहिले पूरै सहर ध्वस्त छ ।’

सान बर्नार्डिनो ग्रामीण आगलागी नियन्त्रण विभागका प्रमुख एरिक सेर्बिनले ३४ हजारभन्दा बढी घरलाई खाली गर्न आग्रह गरिएको बताएका छन् । आगलागी नियन्त्रण प्रयास भइरहे पनि शुक्रबारभन्दा पहिले डढेलोको अवस्था सहज हुने स्थिति नदेखिएको सेर्बिनले जानकारी दिएका छन् । राष्ट्रिय मौसम विज्ञानले बिहीबार रातिसम्म ठूलो हावाहुरी आउने बताएको छ । यसले डढेलो अझै बढ्ने भन्दै सतर्क रहन चेतावनी दिएको छ ।

यो वर्ष गर्मी मौसममा दक्षिण क्यालिफोर्नियामा कयौंपटक भीषण आगलागी भएको छ । डढेलोले कयौं घर नष्ट भएका छन् भने विद्युत् आपूर्ति रोकिएको छ । यहाँका बासिन्दालाई पटक पटक घर खाली गर्न लगाइएको छ ।

वार्षिक लाखौं हेक्टर जंगलक्षेत्र नष्ट

 पेरुमा हरेक वर्ष एक लाख ५५ हजार हेक्टर जंगल नष्ट हुने गरेको खुलासा भएको छ ।

अनियन्त्रित जंगल फँडानीबाट यो अवस्था आइपरेको राष्ट्रिय वन तथा वन्यजन्तु सेवा (सेर्फोर)का प्रमुखले हालै सम्पन्न एक कार्यशाला बैठकमा बताएका छन् । पेरुभियन आमाजोन जंगल क्षेत्रमा लुकिछिपी गरिने खेतीपाती, वन फँडानी, जथाभावी खनिज उत्खनन इत्यादि अवैध तरिकाबाट गरिने कारबाहीका कारण यो विनाश निम्तिएको हो ।

दसौं एसिया प्यासिफिक इकोनोमिक कोपरेसन (एपेक) एक्स्पर्ट ग्रुप अन इल्लिगल लग्गिङ एन्ड एसोसिएटेड ट्रेडको कार्यशाला गोष्ठीमा सेर्फोरका निर्देशक फबियोला मुनोजले बताएका हुन् ।

गैरकानुनी व्यापार र विशुद्ध नाफाको दृष्टिबाट गरिएको जंगल फँडानीले पेरुका जंगलक्षेत्र संकटमा परेका छन् । मुनोजका अनुसार यो आम दृष्टिकोणलाई परिवर्तन गर्न सकेमा र जंगल नमासी वन पैदावारको उत्पादन र प्रयोग गरेमा यसले कति आर्थिक लाभ पुग्छ भन्ने विषयको महत्व पेरुका जनताले बुझेमा पेरुको वन विनाश र त्यसबाट उत्पन्न हुने संकट टर्नेछ ।

आगामी नोभेम्बर महिनामा एपेक आर्थिक राष्ट्रहरूको २४औँ बैठक लिमामा बस्दै छ । सो बृहत् बैठकअघि पेरुको राजधानी लिमामा आयोजित एपेक आर्थिक विशेषज्ञहरूको दुईदिने १०औं कार्यशाला गोष्ठी गत सोमबार सुरु भएको थियो ।

हाल एपेकमा अस्ट्रेलिया, बु्रनाई, क्यानाडा, चिली, चीन, चीनकै हङकङ, चिनियाँ ताइपेई, इन्डोनेसिया, जापान, मलेसिया, मेक्सिको, न्युजिल्यान्ड, पपुवा न्युगिनी, फिलिपिन्स, रूस, पेरु, सिंगापुर, दक्षिण कोरिया, थाइल्यान्ड, संयुक्त राज्य अमेरिका र भियतनामसमेत २१ वटा सदस्य राष्ट्रको सहभागिता रहेको छ ।