उपराष्ट्रपति ‘पासाङ’ र नेपालका लागि जापानी राजदूतबीच भेटवार्ता
मंसिर ३, २०७३ शुक्रबार १५:१०:०
काठमाडौंः उपराष्ट्रपति नन्दबहादुर पुन ‘पासाङ’ र नेपालका लागि जापानका राजदूत मासाशी ओगावाले शिष्टाचार भएको छ । शुक्रबार अपरान्ह उपराष्ट्रपतिको कार्यालय, बहादुरभवन कान्तिपथमा जापानका राजदूत ओगावाले उपराष्ट्रपतिसँग शिष्टाचार भेट गरेका हुन् ।
भेटमा उपराष्ट्रपति पासाङले नेपाल र जापानबीचको औपचारिक सम्बन्ध ६० वर्ष पूरा भए पनि दुई देशबीचको सम्बन्ध निकै पुरानो भएको बताए । उनले नेपाल जापानबीचको सम्बन्ध जनस्तरसम्म विस्तार भएको र दुई देशबीचको सम्बन्धलाई अझै प्रगाढ बनाउनुपर्नेमा जोड दिए ।
उपराष्ट्रपतिले जापानी सहयोग नियोग (जाइका)को ऋण सहयोग बन्न लागेको नागढुंगा सुरुङ मार्ग नेपालको लागि महत्वपूर्ण परियोजना भएको उल्लेख गर्दै छिटो भन्दा छिटो निर्माण प्रक्रिया सुरु गर्नुपर्नेमा जोड दिए ।
उनले नेपाल र जापानबीच दौत्य सम्बन्ध सुरु भएको ६० औँ वर्षगाँठको अवसरमा शनिबार नेपाल र जापानबीच मैत्रीपूर्ण फुटबल हुन लागेकोमा खुशी व्यक्त गरे ।
भेटमा नेपालका लागि जापानका राजदूत ओगावाले जापान र नेपालबीचको दौत्य सम्बन्ध स्थापना भएको ६० औँ वर्षगाँठ दुवै देशका लागि विशेष भएको बताए । उनले नागढुंगा सुरुङ मार्ग निर्माण प्रक्रिया चाँडै सुरु हुने बताए । उनले नागढुंगा सुरुङ मार्ग निर्माणका लागि जापान सरकारले अनुमोदन गरिसकेको जानकारी समेत गराएका छन् ।
भेटमा राजदूत ओगावाले नेपालले केहीं दिन अघि मलेसियामा सम्पन्न एएफसी सोलिडारिटी कपको उपाधी जितेकोमा बधाइ दिए । उनले जापान र नेपालको दौत्य सम्बन्ध स्थापनाको ४० औँ वर्षगाँठको अवसरमा शनिबार जापान र नेपालबीच हुने मैत्रीपूर्ण फुटबल रोमाञ्जक हुने उल्लेख गरे ।
खेलकूदले सबै पक्षलाई एउटै छातामुनी ल्याउने बताउदै उनले नेपालजस्ता विविधतायुक्त देशमा खेलकूदको विकास गर्नुपर्नेमा जोड दिएको भेटपछि उपराष्ट्रपतिका प्रेस संयोजक मनोज घर्तीमगरले जारी गरेको विज्ञप्तिमा उल्लेख गरिएको छ ।
प्रतिक्रिया दिनुहोस !
