चिनियाँ प्रकाशन टोली अन्नपूर्णमा (भिडियोसहित)
काठमाडौः नेपाल भ्रमणमा रहेको एक प्रमुख चिनियाँ प्रकाशनगृहका प्रतिनिधिको टोलीले बिहीबार अन्नपूर्ण पोस्ट्कर्मीसँग अन्तरक्रिया गरेको छ । तीनकुनेस्थित अन्नपूर्ण पोस्ट् कार्यालयमा आयोजित अन्तरक्रियामा नेपाल-चीन सम्बन्ध र सञ्चारका क्षेत्रमा दुई देशबीच हुनसक्ने सहकार्यबारे छलफल भएको थियो ।
चिनियाँ रिड्याक्टोलोजिकल सोसाइटीका अध्यक्ष हाओ चेङ्सेङले चीन र नेपालबीच सदियौंदेखि मित्रतापूर्ण सम्बन्ध रहेको उल्लेख गर्दै आगामी दिनमा सञ्चार क्षेत्रमा सहकार्य बढाउन आवश्यक रहेको धारणा राखे । उनले अन्नपूर्ण मिडिया नेटवर्कका विविध पक्षबारे जिज्ञासा राखेका थिए । हाओले चीनमा अनलाइन तथा सोसल मिडियालाई व्यवस्थित रूपमा सञ्चालन गर्न प्रभावकारी अनुगमन व्यवस्था गरिएको बताए ।
भिडियो हेर्नुहोस्
चिनियाँ प्रकाशनगृहका प्रतिनिधिले नेपालसँग मिडिया क्षेत्रमा सहकार्य बढाउन नेपाली मिडियाका प्रतिनिधिलाई चीनमा आधुनिक तालिम, प्रशिक्षणजस्ता विषयमा सहयोग गर्न तयार रहेको बताए । अन्नपूर्ण पोस्ट्का प्रधानसम्पादक युवराज घिमिरेले चिनियाँ टोलीलाई स्वागत गर्दै छिमेकी देश चीन र भारतमा हुने घटनाक्रमलाई अन्नपूर्णले नजिकबाट नियालेर समाचार सामग्री प्रकाशन गर्दै आएको बताए ।
‘छिमेकी देशमा हुने राजनीतिक तथा अन्य महत्वपूर्ण घटनाक्रम नेपाली मिडियाका लागि चासोका विषय हुन् । हामी ती विषयलाई प्रभावकारी रूपमा पस्किरहेका छौं । मिडिया क्षेत्रको विकासका लागि भविष्यमा बलियो सहकार्य पनि गर्न सक्छौं', उनले भने ।
अन्नपूर्णकर्मीहरूले चिनियाँ टोलीसँग चिनियाँ सञ्चारमाध्यमको विकास र अन्य विविध पक्षबारे चासो राखेका थिए । चिनियाँ मिडियामा नेपालबारे कम समाचार सम्प्रेषण हुनुका कारणबारे उनीहरूले सोधेका थिए ।
नेपालस्थित करेन्ट प्रकाशनगृहको निमन्त्रणामा नेपाल भ्रमणमा रहेको चिनियाँ प्रकाशनगृहका प्रतिनिधिको टोलीले काठमाडौं, ललितपुर र भक्तपुरको पनि भ्रमण गरेको छ ।
करेन्ट प्रकाशनगृहले चिनियाँ टोलीको भ्रमणका अवसरमा बुधबार ‘एक्काईसौं शताब्दीमा न्यु मिडिया' विषयक अन्तरक्रिया पनि आयोजना गरेको थियो । त्यसक्रममा चिनियाँ टोलीले न्यु मिडियाको विस्तार द्रुत भइरहेको र त्यसका सकारात्मक तथा नकारात्मक दुवै पक्ष रहेको बताएका थिए । अन्तरक्रियामा नेपाल प्रज्ञाप्रतिष्ठानका उपकुलपति गंगाप्रसाद उप्रेतीले चीन नेपालको असल र भरपर्दो मित्र रहेको बताउँदै निरन्तर सहयोगका लागि चीनलाई धन्यवाद दिए ।
प्रतिक्रिया दिनुहोस !
