ओखलढुंगा : ग्रामीण क्षेत्रका सरकारी विद्यालयमा शैक्षिक गुणस्तर खस्कदो भएको भन्दै सुधारका लागि समिति गठन गरिएको छ ।
अभिभावकको भेलाले ओखलढुङ्गाको पात्ले गाविसमा शैक्षिक अवस्था सुधार गर्न लाक्पा गेल्जे शेर्पाको संयोजकत्वमा शैक्षिक सुधारका लागि समन्वय समिति गठन गरेको छ ।
पात्ले माध्यमिक विद्यालयको आयोजनामा भएको अन्तरक्रियापछि ७ सदस्यीय समिति गठन भएको प्रधानध्यापक लाक्पा शेर्पाले जानकारी दिए । समितिलाई विद्यालय अनुगमन, नियमन, सुझाव, सल्लाह र समन्वय गर्ने अधिकार दिइएको छ ।
अन्तरक्रियामा विद्यालयका समस्याहरु र शैक्षिक अवस्थाको बारेमा विद्यालय प्रतिनिधीले धारण राखे । गाविसको शैक्षिक अवस्थामा गुणात्मक सुधार गर्दै शैक्षिक रुपमा नमुना गाविस निर्माण गर्न समिति आवश्यक भएको बालबालिका आधारभूत विद्यालयका व्यवस्थापन समितिका अध्यक्ष चित्रबहादुर लामिछानेले जानकारी दिए ।
कार्यक्रममा शिवालय मावि छेर्मादिंगले शैक्षिक अवस्था सुधारका लागि कार्यपत्र प्रस्तुत गरेका थिए । गाविस भित्रका १० वटा विद्यालयबाट र शैक्षिक सुधार समन्वय समितिका प्रतिनिधीसहित ११ सदस्यीय समन्वय समिति गठन भएको जनाएको छ ।
अन्तरक्रियाबाट गाविसको शैक्षिक अवस्था सुदृढीकरणको लागि १५ बुँदे घोषणापत्र जारी गरेको छ ।
प्रतिक्रिया दिनुहोस !
