आर्मी र पुलिस उपाधिका लागि भिड्ने
ताप्लेजुङः त्रिभुवन आर्मी क्लब र नेपाल पुलिस क्लबबीच शनिबार हुने भिडन्तको विजेताले दोस्रो पाथीभरा राष्ट्रिय खुला पुरुष भलिबल प्रतियोगिताको उपाधि जित्ने पक्का भएको छ । सर्वाधिक पुरस्कार राशिको पुरुष भलिबल प्रतियोगिताको चौथो दिन शुक्रबार भएको खेलमा आआफ्ना प्रतिद्वन्द्वीलाई पाखा लगाउँदै आर्मी र पुलिस क्लब उपाधिनजिक पुगेका हुन् ।
आर्मी क्लबले शुक्रबार भएको खेलमा अर्को विभागीय टोली सशस्त्र प्रहरी बलको एपीएफ क्लबमाथि ३-० सेटको जित हात पार्यो । सोही दिन भएको अर्को खेलमा पुलिस क्लबले पनि तुलनात्मक रूपमा कमजोर प्रतिद्वन्द्वी मध्यमाञ्चललाई ३-० सेटले नै पाखा लगायो ।
राउन्ड रोविन लिगका आधारमा सञ्चालित उक्त प्रतियोगितामा आर्मी र पुलिस क्बलले अपराजित रहँदै हात पारेको यो लगातार तेस्रो सफलता हो । दुवै टोलीले समान नौ अंक जोडेका छन् । प्रतियोगिताको अन्तिम दिन दुई चिरप्रतिद्वन्द्वी आर्मी र पुलिस क्लब उपाधिका लागि भिड्नेछन् भने एपीएफ क्लब र पूर्वाञ्चलबीच तेस्रो तथा चौथो वरीयताका लागि प्रतिस्पर्धा हुनेछ ।
प्रतियोगितामा सहभागी अर्को क्षेत्रीय टोली मध्यमाञ्चल भने वरीयताको पाँचौं तथा अन्तिम स्थानमा रहने पक्का भइसकेको छ । एपीएफ क्लबको तीन खेलबाट तीन अंक छ भने पूर्वाञ्चलको तीन खेलबाट दुई अंक छ । एक खेल पनि जित्न नसकेको मध्यमाञ्चलको एक अंकमात्र छ ।
शुक्रबार भएको खेलमा एपीएफलाई हराउन आर्मीले ठूलै कसरत गर्नु पर्यो । पहिलो सेटको खेलमा बलियो प्रतिद्वन्द्वी आर्मीलाई गतिलो चुनौती दिएको एपीएफले दोस्रो र तेस्रो सेटमा भने केही खस्किएको प्रदर्शन गर्यो । एकअर्कासँग अंक खोस्दै अगाडि बढेको प्रतिस्पर्धात्मक खेलमा एकताका आर्मीले १२-८ को अग्रता लिएको थियो ।
त्यसपछि एपीएफ क्लबले आर्मीसँग लगातार आठ अंक खोस्दै खेलमा १६-१२ अंकको अग्रता बनायो । एपीएफ क्लबका लागि स्पाइकर महेन्द्र श्रेष्ठले उत्कृष्ट प्रदर्शन गरे । ताप्लेजुङ नगरपालिकास्थित भानु जन उच्चमाविको मैदानमा भएको उक्त खेलमा दर्शकलाई भरपूर मनोरञ्जन दिँदै पुनः आर्मी अगाडि बढ्यो । एपीएफसँग लगातार ६ अंक खोसेपछि आर्मी १८-१६ ले अगाडि बढेको थियो । आर्मीका लागि स्पाइकर मानबहादुर श्रेष्ठ र धनबहादुर भट्टले महत्ववपूर्ण योगदान गरे ।
त्यसपछि दुवै टोलीले लगातार ठूलो अंक हात पार्न नसके पनि एकअर्कासँग एकदुई अंक खोस्ने क्रम जारी रह्यो । खेलमा आर्मी २४-२३ ले अगाडि रहँदा लगत्तै अर्को अंक थप्न नसकेपछि खेल २४-२४ को रोमाञ्चक स्थितिमा पुगेको थियो । त्यसपछि लगातार दुई अंक जोड्दै अन्ततः आर्मी क्लबले २६-२४ ले नतिजालाई आफ्नो पक्षमा परेको थियो । आर्मी क्लबले दोस्रो र तेस्रो सेटको नतिजालाई भने क्रमशः २५-१९ र २५-१७ ले आफ्नो पक्षमा पार्यो ।
पुलिस क्लब र मध्यमाञ्चलबीचको खेल भने खासै प्रतिस्पर्धात्मक रहेन । सुरुदेखि नै मध्यमाञ्चललाई दबाबमा राखेको पुलिस क्लबले २५-९, २५-१६, २५-१३ अंकले पराजित गर्यो । जिल्ला भलिबल संघ ताप्लेजुङद्वारा आयोजित उक्त प्रतियोगिताको विजेताले तीन लाख ३० हजार र उपविजेताले एक लाख ६५ हजार रुपैयाँ पुरस्कार पाउनेछन् ।
यसैगरी तेस्रो र चौथो वरीयतामा आउने टोलीले ३५÷३५ हजार रुपैयाँ सान्त्वना पुरस्कार हात पार्नेछन् । प्रतियोगिताको सर्वोत्कृष्ट खेलाडीले १० हजार रुपैयाँ पुरस्कार पाउनेछ भने विधागततर्फ उत्कृष्ट स्पाइकर, उत्कृष्ट सेटर, उत्कृष्ट ब्लकर, उत्कृष्ट डिफेन्स र उत्कृष्ट सर्भरले जनही पाँच हजार रुपैयाँ हात पार्नेछन् ।
प्रतियोगितामा आठ टोलीको सहभागिता रहने भनिए पनि अन्तिम समयमा आएर पश्चिमाञ्चल, मध्यपश्चिमाञ्चल र सुदूरपश्चिमाञ्चलले भाग नलिएपछि राउन्ड रोविन लिगका आधारमा खेल सञ्चालन गरिएको हो । अन्तर्राष्ट्रिय भलिबल महासंघको नियमअनुसार पाँचवटा टोलीमात्र सहभागी भए प्रतियोगिता लिन कम नकआउटका आधारमा नभई राउन्ड रोविन लिगका आधारमा सञ्चालन गर्नुपर्ने हुन्छ ।
यसअघि प्रतियोगिताको पहिलो संस्करण पूर्वाञ्चल क्षेत्रीयस्तरमा सम्पन्न भएको थियो । उक्त संस्करणमा ओखलढुंगा भलिबल संघ पहिलो, भोजपुर जिल्ला भलिबल संघ दोस्रो र संखुवासभा जिल्ला भलिबल संघ तेस्रो भएका थिए । पहिलो, दोस्रो र तेस्रो हुने टोलीले क्रमशः दुई लाख ५० हजार, एक लाख ५५ हजार र एक लाख एक हजार रुपैयाँ पुरस्कार पाएका थिए । प्रतियोगिता ताप्लेजुङमा रहेको प्रसिद्ध शक्तिपीठ पाथीभरा माताको नाममा आयोजना गरिएको हो ।
प्रतिक्रिया दिनुहोस !
