खेलभन्दा लोभलाग्दा दर्शक

ताप्लेजुङः  यातायातको सहजताका बाबजुद उत्तिसारो खेलकुद गतिविधि हुने जिल्लाका रूपमा दरिँदैन, ताप्लेजुङ । वर्षभरिमा सदरमुकाम केन्द्रित सीमित खेलकुद गतिविधि हुने गरे पनि हिमाली जिल्ला ताप्लेजुङका स्थानीयमा खेलकुदप्रतिको लगाव भने बिछट्टैको छ । सामान्यभन्दा सामान्य खेलकुद प्रतियोगिता आयोजना भए पनि हरेक पेसा, वर्ग र उमेरसमूहका व्यक्ति खेलस्थलमा झुम्मिनुले स्थानीयमा खेलकुदप्रतिको आकर्षण झल्काउँछ ।

यतिबेला ताप्लेजुङ सदरमुकाममा एकैसाथ दुईवटा प्रतियोगिता आयोजना भइरहेका छन्, ‘दोस्रो पाथीभरा राष्ट्रिय पुरुष भलिबल प्रतियोगिता’ र ‘राष्ट्रपति रनिङ सिल्ड’ को निर्वाचन क्षेत्र नम्बर १ स्तरीय छनोट प्रतियोगिता । लामो समयपछि खेलकुदको रमझममा झुम्ने अवसर पाएपछि अनि के चाहियो, स्थानीयलाई । दुवै प्रतियोगितामा उत्तिकै सक्रिय सहभागिता देखिन्छ, स्थानीय दर्शकको ।

भलिबल प्रतियोगिताको उद्घाटन खेल हेर्न‘भानु जन उच्चमावि’को खेल मैदानमा आएका ८० वर्षीय मंगलहाम श्रीचोङले सदरमुकाममा हुने हरेक खेलकुद प्रतियोगिता हेर्न रंगशाला पुग्ने गरेको बताए । खासगरी भलिबल र फुटबल आफ्नो सबैभन्दा मनपर्ने खेल भएको बताउने मंगलहाम भलिबलको उद्घाटन खेलमा पूर्वाञ्चल टोली नेपाल पुलिस क्लबसँग पराजित भएपछि भने चुकचुकाउँदै थिए ।

‘निकै रमाइलो लाग्यो । खेलकुदमा हारजित त भइहाल्छ, तर, आफ्नै ठिटाहरूले जितेको भए अझै राम्रो हुन्थ्यो’, उनले भने । मंगलहामसँगै खेल हेर्न व्यस्त साच्छमायाँले पनि जीवनको ८० वसन्त पार गरिसकेकी छन् । उनलाई खेलकुद प्रतियोगिताको नियम र प्राविधिक पक्षको बारेमा कुनै ज्ञान छैन तर, कुनै प्रतियोगिता आयोजना भयो कि उनी रंगशाला धाउन भने छाड्दिनन् । उनलाई खेलमैदानमा हारजितका लागि खेलाडीबीच हुने घम्साघम्सी र खेल जितेपछि खेलाडीले मनाउने खुसीयाली औधी मन पर्छ रे ।

राष्ट्रपति रनिङ सिल्ड भइरहेको भानुजन उच्चमाविको खेलमैदान मात्र होइन, पाथीभरा राष्ट्रिय भलिबल भइरहेको जिल्लास्थित आर्मीको कोर्टमा समेत झुम्मिने दर्शकको संख्या उत्तिकै छ । राउन्ड रोविन लिगका आधारमा सञ्चालन भइरहेको भलिबलमा प्रत्येक दिन दुईवटा खेल आयोजना हुन्छन्, बिहान ११ बजे पहिलो र दिउँसो १ बजे दोस्रो । तर, खेल हेर्न बिहान १० बजेदेखि नै स्थानीय दर्शकको भीडभाड सुरु हुन्छ, गतिलो ठाउँ ओगट्न ।

आयोजक जिल्ला भलिबल संघ ताप्लेजुङका अध्यक्ष दिवस चोङबाङ भन्छन्, ‘जिल्लामा खेलकुद प्रतियोगितालाई उत्सवकै रूपमा लिइन्छ । जस्तोसुकै प्रतियोगिता भए पनि खेल हेर्न रंगशालामा ओइरिने दर्शकको संख्यामा कुनै कमी आउँदैन । त्यसमाथि भलिबल र फुटबल प्रतियोगिता आयोजना भयो भने त दर्शकका लागि सुनमा सुगन्ध हुन्छ ।’

दिवसका अनुसार भलिबल र फुटबलको प्रतियोगिता हुँदा त सदरमुकाम छेउछाउका गाउँबाट पनि उत्तिकै दर्शक ओइरिने गर्छन् ।‘भलिबल र फुटबल प्रतियोगिता हुँदा त छेउछाउका गाउँबाट समेत उत्तिकै दर्शक हेर्न आउँछन् । खेल हेर्न शुल्क लगाए पनि दर्शकको संख्यामा कुनै कमी आउँदैन’, भलिबल हेर्न ओइरिएका दर्शकलाई देखाउँदै उनले थपे । हाल जारी भलिबल प्रतियोगितामा समेत खेल हेर्न शुल्क लगाउने योजना बनाए पनि दर्शकको खेलप्रतिको लगावलाई ध्यानमा राखी शुल्क नलाइएको उनले बताए ।

जिल्ला खेलकुद विकास समितिका प्रमुख यज्ञनिधि पौडेल स्थानीय दर्शकलाई प्यासिभ (निष्क्रिय) नभई एक्टिभ (सक्रिय) दर्शकको संज्ञा दिन्छन् । ‘यहाँका दर्शक खेलमात्र हेर्दैनन्, आआफ्नो टोलीको हौसला बढाउन नियमित रूपमा हुटिङ गर्दै रमाइलो पनि गर्छन्’, यज्ञनिधि भन्छन् ।

भलिबल प्रतियोगितामा बिहीबार त्रिभुवन आर्मी क्लब र पूर्वाञ्चलबीच खेल भइरहँदा एक वृद्ध समर्थक र केही किशोरी लगातार रूपमा पूर्वाञ्चलको पक्षमा नारा लगाइरहेका थिए भने अर्को छेउमा बसेका केही महिला र आर्मीका जवान आफ्नो टोलीको हौसला बढाउन व्यस्त देखिन्थे । सायद यज्ञनिधिले यसैप्रति इंगित गरेका थिए । उक्त खेलमा आर्मी ३-० सेटमा विजयी भए पनि अन्तिम समयसम्म पूर्वाञ्चलले गतिलो चुनौती दिएको थियो ।

भानुजन उच्चमाविको खेल मैदानमा राष्ट्रपति रनिङ सिल्डको मजा लिइरहेका ताप्लेजुङ नगरपालिका-३ का कैलाश सिग्देल पनि स्थानीयले खेलकुद प्रतियोगितालाई सानोतिनो उत्सवकै रूपमा लिने गरेको बताउँछन् । ‘स्थानीयका लागि खेलकुद प्रतियोगिता हुनु भनेको उत्सवजस्तै हो । जनैपूर्णिमा त यहाँ ठूलै फुटबल प्रतियोगिता पनि हुन्छ, प्रतियोगिता हेर्न दर्शकको ओइरो लाग्छ’, उनी भन्छन् ।

जिल्लामा आयोजना हुने प्रतियोगिताको अर्को रमाइलो पक्ष भनेको प्रायोजन हो । देशका विभिन्न भागमा आयोजना हुने प्रतियोगितालाई व्यापारिक संघसंस्थाहरूले प्रायोजन गर्ने प्रचलन छ । तर हाल ताप्लेजुङमा जारी भलिबल प्रतियोगितालाई भने जिल्लावासीले व्यक्तिगत रूपमा प्रायोजन गरेका छन् । पुरुष भलिबलमा देशकै सर्वाधिक पुरस्कार राशिको दाबी गरिएको पाथीभरा प्रतियोगितालाई राजधानीमा विभिन्न पेसा व्यवसाय गरी बसेका ताप्लेजुकै बलबहादुर तामाङ, रमेश बराल, ईश्वरी पौडेललगायतले प्रायोजन गरेका छन् । यसले पनि जिल्लावासीमा खेलप्रतिको लगाव झल्काउँछ ।