नेपथ्यसँग झुम्यो बुटवल
बुटवल:
यानिमाया, बटौलीको बजारमा, यानिमाया
यानिमाया, चुरेटाको दोकान, यानिमाया
गीत गाउँदै बुटवलको स्टेजमा चढेका अमृत गुरुङसँग बटौलीवासी करिब साढे दुईघन्टा झुमेका छन् । नेपथ्यले एकताका लागि संगीत नारा दिएर नेपथ्यले शनिबार साँझ बुटवललाई संगीतमय बनाएको हो ।
‘चुनावको घोषणा भएको छ । हामी आफ्नो ठाउँबाट जुटेर लागौं है, भन्दै नेपथ्यका अमृतले ‘गाउँगाउँबाट उठ, बस्तीबस्तीबाट उठ, बोलको गीत गाउँदा बुटवलको कालिका माविको प्रांगण थर्किएको थियो । झन्डै पाँच हजार सहभागीले अमृतको समूहलाई राति ९ बजेसम्म साथ दिएका थिए ।नेताहरूले मिलेर बसेका नेपालीलाई जात, धर्मका आधारमा विभाजन गर्न खोजेको भन्दै उनले युवाहरूलाई त्यसको पछि नलागी मिलेर बस्न सुझाए ।
तत्कालीन द्वन्द्वको घाउमा मुलुक डुबेको बेला सांगीतिक माहोलमार्फत सुन्दर शान्त नेपाल बनाउने देशव्यापी अभियान सुरु गरेको नेपथ्यको क्रेज संगीतप्रेमीबीच अझै पनि उस्तै छ भन्ने प्रमाणित बुटवलले गर्यो । भेडाको ऊनजस्तो, मेरो नेपाल, जोगले हुन्छ भेट, मै नाचेँ छम् छम्, कोसीको पानीलगायतका गीत गाउँदै अमृतले दर्शकलाई आफ्नो सांगीतिक यात्राको २५ वर्ष पुराना याद दिलाएका थिए । गीतसंगीतसँगै विभिन्न जातजाति, भाषा, धर्म र क्षेत्रको नाममा भइरहेको लडाइँ झगडा समाप्त गर्न र आउँदै गरेको निर्वाचनमा आफ्नो मनले खाएको र देशले चाहेको उम्मेदवारलाई भोट हाल्न पनि उनले दर्शकलाई आग्रह गरे ।
प्रस्तुतिकै क्रममा अमृतले बुटवलको प्राकृतिक र आधुनिक सुन्दरताको पनि वर्णन गरे । ‘पहिले प्राकृतिक सुन्दरताले भरिएको बटौली बजार आज विकासका पूर्वाधार निर्माणसँगै ठूलो र आधुनिक बुटवल भएको छ सानो सानो क्षेत्र जोडिएर ठूलो सहर बनेजस्तै बुटवलवासीको मन पनि ठूलो बनोस् ।’ अमृतलाई किबोर्डमा सुरज, ड्रम सेटमा धु्रव, गितारमा निरज, बेस गितारमा सुबिन र मादलमा शान्तिले साथ दिएका थिए । कन्सर्टबाट बचेको रकम अभियान अनाथ आ श्रमलाई प्रदान गरिने आयोजक सन्तोष टण्डनले जानकारी दिए ।
प्रतिक्रिया दिनुहोस !
