नेपालगन्ज गोल्ड कप आजदेखि
नेपालगन्जः नेपालगन्जमा विहीबारदेखि टुबोर्ग दोस्रो नेपालगन्ज गोल्डकप फुटवल प्रतियोगिता आज (बिहीबार) देखि हुँदैछ । प्रतियोगिता उद्घाटन खेल साविक विजेता सुदूरपश्चिम-११ र दिल्ली युनाइटेका बीचमा हुने आयोजकले जनाएको छ ।
तीन जना विदेशी खेलाडी भित्र्याएको साविक विजेता सुदूरपश्चिम यस पटक अझ बलियो भएको दावी गरेको छ । सुदूरपश्चिमका ब्यवस्थापक सुरेश हमालले विदेशी खेलाडी भित्र्याएपछि टीम अझ बलियो बनेकाले उपाधि जित्ने साँेचका साथ नेपालगन्ज आएको बताए ।
आफ्ना खेलाडीहरु निरन्तर प्रतियोगिता खेलिरहेकाले फिट रहेको बताउँदै हमालले मिड फिल्ड र दुई जना फरवार्ड विदेशी राखिएको जानकारी दिए । टीम क्याप्टन प्रणय अन्जानले धेरै अभ्यास खेल खेलेर आएको टीमको सेटिङ राम्रो रहेको बताए ।
दिल्ली युनाइटेड पनि नेपालगन्ज गोल्ड कप लैजाने तयारीका साथ आएको जनाएको छ । प्रशिक्षक अनसुल कटियारले दुई दिनअघि मात्रै भारतीय लिगमा दोस्रो डिभिजन छनौट भएर आएकाले खेलाडीहरु उच्च मनोबलका साथ मैदानमा उत्रीने दावी गरे । क्याप्टन डन लेप्चाले यूवा खेलाडीहरुलाई मौका दिएर आएको बताए ।
बाँके जिल्ला फुटवल संघको आयोजनामा हुन लागेको प्रतियोगितामा ८ वटा टीमले सहभागिता जनाउने भएका छन् । उक्त प्रतियोगिताको उद्घाटन एन्फाका अध्यक्ष नरेन्द्र श्रेष्ठले गर्ने भएका छन् ।
विजेताले पाँच लाख रुपैयाँका साथ कप, दोस्रो हुनेले दुई लाख ५१ हजार पाउने संघका अध्यक्ष भोजराज शाहीले जानकारी दिए । प्रत्येक खेलमा म्यान अफ म्याच हुनेलाई एक थान लेनेभो मोबाइल, बेष्ट गोल किपर, बेष्ठ डिफेन्स, बेष्ट मिडफिल्डर, बेष्ट स्कोरर र बेष्ट कोचलाई ५÷५ हजार रुपैयाँ प्रदान गरिने शाहीले बताए ।
प्रतियोगिताको समूह ‘क' मा सुदूरपश्चिम-११, दिल्ली युनाइटेड, संकटा र सशस्त्र प्रहरीको एपीएफ क्लव, समूह ‘ख' मा नेपाल प्रहरी, नेपालगन्ज-११, मनाङ मस्र्याङ्दी र रुपन्देही-११ रहेका छन् ।
फोटोः सुदूरपश्चिम र दिल्लीका टीम प्रशिक्षक तथा क्याप्टन ।
प्रतिक्रिया दिनुहोस !
