नयाँ वर्षमा ‘घामपानी'

नेपाली चलचित्र ‘घामपानी’को ट्रेलर सार्वजनिक गरिएको छ । अन्तरजातीय प्रेमकथामा निर्माण भएको चलचित्र दीपेन्द्र लामाले निर्देशन गरेका हुन् । दयाहाङ राई र केकी अधिकारीको प्रमुख भूमिका रहेको चलचित्र आगामी वैशाख १ गते रिलिज हुँदैछ । दयाहाङको जन्मदिनमा चलचित्र रिलिज हुन लागेको हो ।

बिहीबार ट्रेलर सार्वजनिक गरिएको हो । तामाङ युवक र ब्राह्मण युवतीको कथालाई फिल्मले उठान गरेको ट्रेलरबाट बुझिन्छ । अढाई मिनेट लामो ट्रेलर हाइलाइट्स नेपालको युट्युब च्यानलमा हेर्न सकिन्छ । ट्रेलर रिलिज कार्यक्रममा निर्देशक तथा वितरक प्रचण्डमान श्रेष्ठ, पत्रकार सन्दीप सापकोटा, समीक्षक यज्ञश लगायतले फिल्मको सफलताको कामना गरेका थिए ।