काठमाडौं : नेपाल आर्ट काउन्सिलमा ६ जना युवा कलाकारका कला एकैसाथ प्रदर्शनी गरिएको छ । ‘प्रदर्शनी' शीर्षकमा भएको कला प्रदर्शनीमा विवेक श्रेष्ठ, विपिन महर्जन, रविनकाजी शाक्य, राजेन्द्र बुढामगर, रोशन महर्जन र सुरज पौडेलका कलाकृति राखिएका थिए ।
प्रदर्शनीमा राखिएका कलामा प्राकृतिक दृश्य, जीवनका विविध आयाम र परिवेश झल्किने विषयवस्तु, पर्यावरण र वातावरण प्रदूषण, संस्कृति तथा प्राकृतिक सौन्दर्यलाई कलाकारले क्यानभासमा पोखेका छन् । विविध विषय र परिवेश झल्कने कला प्रदर्शनीमा राखेको सहभागी कलाकार रविनकाजी शाक्यले बताए । उनले भने, ‘कलामा सपना र विपनाका विषयलाई रङमार्फत अभिव्यक्त गर्ने कोसिस गर्दै कलात्मक सौन्दर्य चेत भर्ने प्रयत्न हाम्रो छ ।'
कला आफूभित्रको अनुभूतिलाई व्यक्त गर्ने सशक्त माध्यम भएकाले चित्रमार्फत समाज, प्रकृति र संस्कृतिका विषयलाई उतारेको कलाकार विवेक श्रेष्ठले बताए । मुहारचित्रमार्फत संस्कृति र मानवीय चरित्रलाई कलात्मक रूपमा कलाकार विपिन महर्जनले चित्रण गरेका थिए । मानिसका सुनौला सपनाका विषयलाई कलाकार रविनकाजी शाक्यले क्यानभासमा प्रस्तुत गरेका थिए । शाक्यले बनाएका मूर्ति पनि प्रदर्शनीमा राखिएको थियो ।
वातावरण प्रदूषणका कारक तत्ववलाई कलात्मक रूपमा राजेन्द्र बुढामगरले क्यानभासमा उतारेका थिए । बुढामगरले मोबिल र फ्याँकिएका फोहोर वस्तुलाई प्रयोग गर्दै कला सिर्जना गरे । रोशन महर्जनको चित्रमा मानिसमा रहेको आशक्ति भाव देखियो । धर्म, संस्कृति तथा समाजका विविध आयाम र परिवेशलाई महर्जनले चित्रमा प्रस्तुत गरेका थिए ।
कलाकार सुरज पौडेलले जंगल र त्यसको महत्ववलाई समेटेर प्राकृतिक सौन्दर्यलाई चित्रमा देखाएका थिए । कल्पनाका दृश्यचित्रमा जंगल र हरियाली परिवेशको खोज पौडेलका कलामा देखियो । पाँचदिने सो कला प्रदर्शनी शनिबार सकिएको हो ।
प्रतिक्रिया दिनुहोस !
