प्रधानमन्त्री कार्यालयमै चार सचिव रिक्त
काठमाडौं : सरकारले प्रधानमन्त्री तथा मन्त्रिपरिषद् कार्यालयका चारवटा महाशाखा सचिवविहीन बनेका छन् । सरकारले कात्तिक ६ गते प्रधानमन्त्री कार्यालयका चारसहित दर्जनभन्दा बढी सचिव सरुवा गरेपछि महाशाखा सचिवविहीन भएका हुन् । सरकारले प्रधानमन्त्री तथा मन्त्रिपरिषद् कार्यालयको संघीयता तथा शासकीय सुधार महाशाखा हेर्ने सचिव केदारबहादुर अधिकारी, आर्थिक पूर्वाधार महाशाखा हेर्ने सचिव शंकर अधिकारी, जनशक्ति तथा व्यवस्थापन महाशाखा हेर्ने सचिव रामकुमार आचार्य र सामाजिक विकास महाशाखा हेर्ने सचिव ङइन्द्रप्रसाद उपाध्यायको एकै पटक अन्यत्र सरुवा गरेको थियाे।
सचिव नहुँदा ती महाशाखाले गर्ने महत्वपूर्ण सबै काम ठप्प भएका छन् । संघीयता कार्यान्वयन गर्ने तथा अन्य महत्वपूर्ण महाशाखा सचिवविहीन हुने गरी सचिव सरुवा गरिएको भन्दै कार्यालयभित्रै प्रधानमन्त्रीको आलोचना भएको छ । महिला बालबालिका तथा समाजकल्याण मन्त्रालयका सचिव प्रेमकुमार राई र सूचना तथा सञ्चार मन्त्रालयका सचिव महेन्द्रमान गुरुङलाई प्रधानमन्त्री कार्यालयमा ल्याइएको भए पनि उनीहरूलाई कुनै जिम्मेवारी तोकिएको छैन ।
सरकारले कात्तिक ६ गते प्रधानमन्त्री कार्यालयका चारसहित दर्जनभन्दा बढी सचिव सरुवा गरेपछि महाशाखा सचिवविहीन भएका हुन् ।
मुख्यसचिव लोकदर्शन रेग्मीले समेत गत बुधबारदेखि मात्रै कार्यालयमा पदबहाली गरी काम थालेका छन् । उनले विभिन्न महाशाखाबाट ब्रिफिङ लिन थाले पनि महाशाखा हेर्ने सचिवहरू नहुँदा समस्या भएको छ । प्रधानमन्त्री तथा मन्त्रिपरिषद् कार्यालयकै महाशाखामा दुई तीन महिनामा सचिव फेरिँदा प्रधानमन्त्री कार्यालयले गर्ने काममा चुस्तता आउन सकेको छैन । प्रधानमन्त्री कार्यालयमा डेढ महिनाअघि मात्रै पर्यटन मन्त्रालयबाट शंकर अधिकारी र वाणिज्य मन्त्रालयबाट ङइन्द्रप्रसाद उपाध्यायलाई ल्याइएको थियो । तर, उनीहरूले डेढ महिना पनि महाशाखाको काम गर्न पाएनन् । उनीहरूले हेरेको शाखाको जिम्मेवारी अन्य कसैलाई पनि दिइएको छैन ।
प्रधानमन्त्री कार्यालयमा सचिवहरू खासै बस्न चाहँदैनन् । सचिवहरूले प्रधानमन्त्री कार्यालयमा बस्दा अपमानित भएको महसुस गर्नुपर्ने अवस्था रहेको र यस्तो अवस्था हुनु दुःखद भएको प्रधानमन्त्री तथा मन्त्रिपरिषद् कार्यालयका प्रवक्ता हरिप्रसाद पन्थीले बताए । ‘हामीकहाँ प्रधानमन्त्री कार्यालयमा सचिवहरू बस्नै खोज्नुहुन्न, सचिव आउनासाथ कसरी हुन्छ अन्यत्र जान खोज्नुहुन्छ त्यसैले पनि समस्या भइरहेको छ', प्रधानमन्त्री कार्यालयका प्रवक्ता सहसचिव पन्थीले अन्नपूर्णसँग भने ।