आतंकवादलार्इ सघाउने राष्ट्रको सूचीमा राखेकोमा उत्तर कोरिया आक्रोशित

सोल : अमेरिकी राष्ट्रपति डोनाल्ड ट्रम्पले उत्तर कोरियालाई आतंकवादी गतिविधिमा लगानी गर्ने राष्ट्रका रूपमा हालै राखेकोमा उत्तर कोरियाले विरोध गरेको छ ।अमेरिकाले बिनाआधार आफूमाथि यस्तो आरोप लगाएको प्रतिक्रिया दिँदै उत्तर कोरियाले यस आरोपलाई अमेरिकाको उत्तेजना फैलाउने काम गरेको बताएको छ ।

अमेरिकाले यसअघि पनि यस्ता आरोपहरू लगाउने गरेको तर ती प्रमाणित नभएको पनि उत्तर कोरियाले स्पष्ट पारेको छ । यस खालका प्योङयाङविरोधी अभियानले आफ्नो देशको आणविक कार्यक्रमको विस्तारका क्षेत्रमा कुनै पनि असर नपर्ने पनि बताएको छ । यसका साथै उत्तर कोरियाले आफ्नो देशको आतंकवादसँग कुनै पनि सम्बन्ध नरहेको स्पष्टीकरण पनि दिएको छ।

उसले भनेको छ, ‘आतंकवादसँग सम्बन्धै नरहेका हामीलाई आतंकवादी बनाउने प्रयास गरिएको छ । त्यसैले अमेरिकाले हामीलाई आतंकवादलाई सघाउने मुलुकको सूचीमा राख्नु र नराख्नुको कुनै पनि अर्थ छैन ।’ त्यसैगरी अमेरिकी सैन्य बलले दक्षिण कोरियाका लागि ६ वटा लडाकु जहाज दिने भएको समाचारको पनि कडा शब्दमा विरोध गरेको छ ।

आगामी महिना ती जेट विमानहरू अमेरिकाले दक्षिण कोरियालाई दिने भएको हो । अमेरिका र दक्षिण कोरियाबीच संयुक्त रूपमा हुने सैन्य अभ्यासको लागि प्रयोग गर्न ती लडाकु जेट विमान पठाउन लागिएको हो । उत्तर कोरियाले अमेरिकाको यस घटनाको पनि विरोध गरेको छ । उसले भनेको छ, ‘ती विमानहरू अमेरिकाले दक्षिण कोरियालाई दिएको भनेर बताउनु भन्दा पनि सैन्य अभ्यासमा प्रयोग गर्ने र उत्तर कोरियाका विरुद्धको अभ्यासमा प्रयोग हुने हुन् ।’

अमेरिकी लडाकु विमान जापानको ओकिनावा हवाई केन्द्रबाट कडेना हवाई शिविर हुँदै दक्षिण कोरियास्थित दक्षिण कोरिया र अमेरिको संयुक्त सैन्य अभ्यास स्थलसम्म पुर्‍याइने बताइएको छ । पछिल्लो समयमा जापान, दक्षिण कोरिया र अमेरिकासँग पनि उत्तर कोरियाको सम्बन्ध बिग्रिएको छ।

उत्तर कोरियाले जारी राखेको आणविक कार्यक्रमका कारण यस्तो अवस्था आएको हो । जसले गर्दा अमेरिका र उत्तर कोरियाले एक अर्काका विरुद्धमा निकै कडा अभिव्यक्ति दिँदै आएका छन् ।
अमेरिकी राष्ट्रपति डोनाल्ड टम्पको हालै भएको दक्षिण कोरिया, जापान र चीनको भ्रमणका समयमा पनि राष्ट्रपति टम्पले उत्तर कोरियाको निकै आलोचना गरेका थिए ।