एमालेले सभासद् बनाएका यी धनाढ्य कहाँ गए ?

काठमाडौं : नेकपा एमालेले सांसद बनाएका यी धनाढ्य आज कहाँ छन् ? पार्टीमा योगदान भएका पुराना, त्यागी र इमान्दार नेतालाई छोडेर एमालेले नेपालकै सबैभन्दा धनी विनोद चौधरी, ठुलो व्यवसायिक घराना गोल्छा परिवारकी बुहारी राज्यलक्ष्मी गोल्छा र विवादास्पद छविका धनाढ्य ल्हारक्याल लामा सांसद बनायो । तर आज उनीहरु सबै एमालेमा छैनन् ।

विनोद चौधरी कांग्रेसतिर

खर्बपति चौधरी नेपाली कांग्रेसमा पुगेका छन् । २०६४ सालको पहिलो संविधान सभामा एमालेले समानुपातिकतर्फबाट चौधरीलाई सभासद बनाएको थियो । भारतनिकट मानिएका चौधरी एमालेको भारतप्रतिको पछिल्लो समयको अडान र नाकाबन्दीको समय एमालेको भुमिकादेखि रुष्ट भएर एमालेसँग अलग्गिएका हुन् ।

भारतनिकट मानिने चौधरी कांग्रेसबाट समानुपातिक सिटमा प्रतिनिधि सभा सदस्य हुने पक्का जस्तै छ । चौधरी विश्वप्रसिद्ध फोर्ब्स म्यागेजिनको अर्बपतिको सूचीमा पर्ने एक मात्र नेपाली हुन् । फोर्ब्स पत्रिकाका अनुसार अहिले उनको सम्पत्ति एक अर्ब ३० करोड अमेरिकी डलर रहेको छ ।

चौधरी समूहको विश्वका विभिन्न देशका होटेल र अन्य क्षेत्रमा ठुलो लगानी रहेको छ । लोकप्रिय चाउचाउको वाइवाइको ब्रान्डलाई समेत विश्वका विभिन्न देशमा चौधरी समूहले विस्तार गरिसकेको छ ।

राजावादी बनिन् राज्यलक्ष्मी

नेपालकै धनाढ्य गोल्छा परिवारकी राज्यलक्ष्मी गोल्छाले सांसद भएकै समय एमालेलाई विवादमा तानिन् । २०७० सालको दोस्रो संविधान सभामा एमालेले राज्यलक्ष्मीलाई सभासद बनाएको थियो । एमालेका नेताहरुलाई ७ करोड बुझाएर सांसद भएको भन्दै उनले नेता र पार्टीको सार्वजनिकरुपमै उछितो काढिन् ।

एमाले मोरङको नेतृत्वदेखि केन्द्रसम्म राज्यलक्ष्मीको कारण विवादमा तानियो । एमालेकै सर्वत्र आलोचना भयो । गोल्छाले सांसद रहँदै मधेसी समुदायले उठाएको मागलाई एमालेले गम्भीरतापूर्वक नलिएको र समस्या समाधान गर्न नचाहेको आरोप समेत लगाउन भ्याइन् ।

तर, अहिले उनी कहाँ छिन् ? कुनै एमाले नेताले खोजीनीति गरेका छैनन् । एमालेवृत्तमा उनको कुनै चर्चा छैन, उनको स्थानमा अहिले कोमल वलीले लिएकी छिन् । अहिले उनी एमालेमै छैनन् । प्रकाशचन्द्र लोहनी नेतृत्वको एकीकृत राष्ट्रिय प्रजातन्त्र पार्टीबाट प्रतिनिसधिसभातर्फ समानुपातिकको बन्दसूचीमा गोल्छाको नाम छ ।

ल्याहारकाल माओवादीमा

एमालेले विवादास्पद छवि भएका धनाढ्य ल्याहारकाल लामालाई २०६४ सालको पहिलो संविधान सभामा समानुपातिकबाट सभासद बनायो । सभासद मात्र होइन झलनाथ खनाल प्रधानमन्त्री हुँदा लामा अर्थराज्यमन्त्री सम्म भए । उनी अर्थराज्यमन्त्री हुँदा समेत विवाद तानिए ।

दोहोरो नागरिकताको प्रमाण फेला परेपछि उनले मन्त्रीबाट राजीनामा दिन बाध्य भए । पहिलो संविधानसभामा एमालेलाई उपयोग गरेका लामाले २०७० सालको दोस्रो संविधानसभामा नेकपा माओवादी केन्द्रलाई उपयोग गरेर सभासद् बन्न सफल भए ।

उनले पनि एमाले नेतालाई करोडौँ बुझाएर सभासद भएको चर्चा चल्यो । तर, केही समयपछि त्यो कुरा सेलायो । उनी पछिल्लो पटक अहिले लामा माओवादीमा छन् । सार्वजनिक पदमा रहँदा ९ करोड ४४ लाख रुपैंया गैरकानुनी रुपमा आर्जन गरेको आरोप पनि उनीमाथि लाग्यो । तर लामाले विशेष अदालतबाट सफाइ पाए। विशेष अदालतले उनलाई सफाई त दियो नै, साथै आम्दानीको तुलनामा खर्च कम भएको भन्दै उनको ७४ लाख रुपैंया बचत हुनुपर्ने फैसला समेत गर्‍यो ।

चौधरी, गोल्छा र लामा प्रतिनिधि पात्र मात्रै हुन्, पार्टीमा योगदान गरेका भन्दा धनाढ्य र सत्ता- शक्तिका लागि अरु पार्टीबाट आएका स्थान दिएका धेरै उदाहण छन् । स्वार्थका लागि एमालेमा आएकाहरु अधिकांश पार्टीबाट बाहिरिसकेका छन् ।

अब पालो कोमल वलीको

एमालेले ६ महिना अगाडि राष्ट्रिय प्रजातन्त्र पार्टी छोडेर आएकी कोमल वलीलाई राष्ट्रिय सभाका उम्मेदवार बनाएको छ । के एमाले लोकगायिका वलीको एमालेमा लामो समय रहलिन त ? वलीलाई उम्मेदवार बनाएकोमा पछि आलोचना स्वर सुनिन थालेका छन् ।

सामाजिक सञ्जालमा लोकगायिका समेत रहेकी दाङकी वलीलाई उम्मेदवार बनाउने निर्णयको आलोचना भइरहेको छ । कुनै बेला राप्रपाकी नेतृ रहेकी वलीलाई पार्टीमा प्रवेश गरेको केही महिनामै प्रदेश नम्बर ५ बाट राष्ट्रिय सभाको उम्मेदवार बनाएको हो । पार्टीमा योगदान गरेका, पुराना, इमान्दार नेताहरु छोडेर राष्ट्रिय सभा जस्तो गरिमामय स्थानमा वलीलाइ पुर्‍याउन लगिएको भन्दै एमालेकै नेताहरुले सामाजिक सञ्जाल रंग्याएका छन् ।