प्रदेश सरकारसँग समृद्धिको आस
जनकपुरधाम : प्रदेश २ को अस्थायी मुकाम जनकपुर तोकिएपछि यहाँ प्रदेश सरकार सञ्चालनको तयारी छ । पछिल्लो समय आन्दोलनको केन्द्रबिन्दुका रूपमा रहेको जनकपुरले अहिले प्रदेश राजधानी र परिवर्तित राजनीतिको अभ्यासस्थलका रूपमा चर्चा पाउन थालेको छ ।
आन्दोलनकै कारण विकासको गतिमा पछि परेको यहाँबाट प्रदेश सरकार सञ्चालन हुने भएपनि ऊर्जा थपिएको साहित्यकार अवधेश पोखरेल बताउँछन् । प्रदेशसभा सदस्यले मातृभाषामा शपथग्रहण गरेपछि राम्रो सन्देश गएको पोखरेलको ठम्याइ छ ।
विगतका दुःख बिर्सिएर राजनीतिक सुनिश्चिता र विकासको आस प्रदेश सरकारसँग यहाँका बासिन्दाले गरेको प्राध्यापक विजय दत्त बताउँछन् । ‘यहाँको नेतृत्व योजनाबद्ध रूपमा विकासमा लागे यो नमुना प्रदेश बन्न सक्छ’, उनी भन्छन्, ‘पर्यटन, कृषि, कलकारखाना सबैका लागि यो प्रदेशमा प्रचुर सम्भावना छ । अब यसबाटै जनताको जीवनस्तर उकास्नु प्रदेश सरकारको पहिलो प्राथमिकताको विषय बन्नुपर्छ ।’
‘पहिला जनकपुर बसेर केही गर्न सकिँदैन भन्ने लाग्थ्यो तर यहाँ तीव्र गतिमा भइरहेको परिवर्तन हेर्दा आस जाग्न थालेको छ ।’ प्रशान्त झा, स्थानीय युवा
होटल व्यवसायी धमेन्द्र साहका बन्द, हडताल र आन्दोलनका कारण व्यापार÷व्यवसाय चौपट भएर लगानी ठप्प हुन थालेको थियो । तर, प्रदेश राजधानीको सम्भावना र अस्थायी मुकाम तोकिएपछि व्यापारीका लागि पनि लगानीको बाटो खुलेको उनी बताउँछन् । ‘पहिला भारतीय पर्यटकका भरमा व्यापार चल्ने गथ्र्यो’, उनी भन्छन्, ‘तर, अहिले प्रदेशको अस्थायी मुकाम भई प्रदेश सरकार यहींबाट सञ्चालन हुने भएपछि आठ जिल्लाबाट कामकाजका लागि जनकपुर आउनेको संख्या बढ्नेछ । यस्तो अवस्थामा व्यापार÷ व्यवसाय पनि फस्टाउनेछ ।’
रोजगारीको अवसर पनि बढ्ने हुनाले अब यस क्षेत्रका बासिन्दाको भविष्य सुखद हुने युवा अभियन्ता नागेन्द्र साह बताउँछन् । ‘विभिन्न आन्दोलनका क्रममा सबैभन्दा बढी क्षति युवाले नै भोग्नुपर्यो’, उनी भन्छन्, ‘राजनीतिक संक्रमणको आडमा शिक्षा क्षेत्र धराशायी हुनुका साथै स्वास्थ्य, यातायात सबैको बेहाल भयो । अब राजनीतिक स्थिरताका साथै समृद्धिको बाटो खुलोस् भन्ने चाहना छ ।’
जनकपुर जीर्ण सडक, फोहोर बाटाघाटा, खुला नाला र लामखुट्टेको प्रकोप भएको सहर भन्दा स्थानीय युवा प्रशान्त झालाई दुःख लाग्थ्यो । भन्छन्, ‘तर, अहिले ती सबै समस्या पन्छाउँदै यो सहर अस्थायी राजधानी नै बनेपछि गर्व लाग्न थालेको छ ।’
यहाँ दर्जनौं विकासका योजना सम्पन्न भएपछि सुन्दर नगरका बासिन्दा हुने परिकल्पनाले पनि रोमान्चित गर्ने गरेको उनी सुनाउँछन् । भन्छन्, ‘पहिला जनकपुर बसेर केही गर्न सकिँदैन भन्ने लाग्थ्यो तर यहाँ तीव्र गतिमा भइरहेको परिवर्तन हेर्दा आस जाग्न थालेको छ।’
प्रतिक्रिया दिनुहोस !
