स्वाथ्यकर्मीको चरम लापरवाही : आइरन चक्की दिनुपर्ने गर्भवतीलाई ‘अल्वेण्डाजोल’

बाबियाचौर : म्याग्दीको बेनी अस्पतालको औषधि वितरण कक्षका स्वास्थ्यकर्मीले आइरन चक्की दिनुपर्ने गर्भवती महिलालाई जुकाको औषधि ‘अल्वेण्डाजोल’को बट्टा दिएको खुलासा भएको छ । २०७४ मंसिर ४ गते अस्पतालमा गर्भपरीक्षण गर्न गएकी बेनी नगरपालिका–५ सेतोढुङ्गाकी समीक्षा खत्री कुँवरलाई आइरन चक्की दिनुपर्नेमा अल्बेण्डाजोलको बट्टा दिएको खुलासा भएको हो ।

कुँवर र उनका परिवारले माघको २३ गतेमात्रै आफूलाई आइरन चक्की नभएर जुकाको औषधि दिएको थाहा पाएपछि तत्कालै बेनी अस्पतालमा पुगेर स्वास्थ्य परीक्षण गराएका थिए । उनीहरुले अस्पताल, जिल्ला प्रशासन कार्यालय र बेनी नगरपालिकाको कार्यालयमा उजुरी दिएका छन् । खड्का हाल सात महिनाकी गर्भवती छिन् । स्वास्थ्यकर्मीले गलत औषधि दिएका कारण आमा र बच्चाको स्वास्थ्य जोखिममा परेको पीडितको गुनासो छ ।

आइरनको कमीले आमा र बच्चाको स्वास्थ्यमा असर पर्न सक्ने भन्दै छानबिन गरी लापरबाही गर्ने कर्मचारीलाई कारबाही र गर्भबती महिलाको स्वास्थ्यको सुनिश्चितता हुनुपर्ने माग गरेका छन् । अस्पतालका प्रमुख डा रोशन न्यौपानेले औषधि दिँदा कमजोरी भएको स्वीकार गर्दै बेनी र पोखराको अस्पतालमा भिडियो एक्सरे गर्दा आमा र बच्चाको स्वास्थ्यमा भने असर नगरेको देखिएको बताए ।

चेप्टेजुका परेको अवस्थामा गर्भवतीलाई समेत ९० दिनसम्म अलबेण्डाजोल खुवाउनुपर्ने तर कुँवरको स्वास्थ्य परीक्षण रिपोर्टमा जुका परेको नदेखिएको उनको भनाइ छ । बेनपाका उपप्रमुख सञ्जु बरुवाल, बेनपा–५ का वडाध्यक्ष लक्ष्मण बानियाँ र अस्पताल विकास समितिका अध्यक्ष माधवप्रसाद रेग्मीको रोहबरमा सोमबार डा न्यौपाने र पीडित परिवारबीच विभिन्न बुँदामा सहमति भएको छ ।

लापरबाही गर्ने कर्मचारीमाथि छानबिन गरी विभागीय कारबाही गर्ने, गर्भवतीको नियमित स्वास्थ्य परीक्षण र सहज रुपमा सुत्केरी हुने व्यवस्था मिलाउने सहमति भएको अस्पताल विकास समितिका अध्यक्ष रेग्मीले बताए । अध्यक्ष रेग्मीका अनुसार छानबिनका क्रममा लापरबाही गरेको भेटिएकाले औषधि वितरण कक्षमा रहेकी कर्मचारी राधिका आचार्यलाई विभागीय कारबाही प्रक्रिया अघि बढाइको छ ।

पछिल्लो समय बेनी अस्पतालमा चिकित्सक र स्वास्थ्यकर्मी नभेटिने, प्राविधिक शिक्षालयबाट अभ्यासका लागि आएका सिकारुका भर पर्नुपर्ने, गलत औषधि दिने, घाउको टाँका लगाउँदा कपास भित्रै छोड्ने, शव परीक्षणमा ढिलासुस्ती गर्नेलगायत गुनासा आएका छन् ।

खिवाङमा सामुदायिक स्वास्थ्य इकाई

म्याग्दीको अन्नपूर्ण गाउँपालिका–६ खिवाङमा सामुदायिक स्वास्थ्य इकाई स्थापना भएको छ । भौगोलिक विकटता र वडास्तरको स्वास्थ्य संस्था टाढा भएका कारण स्वास्थ्य सेवा प्राप्त गर्न कठिनाइ भोग्दै आएका खिवाङवासीको स्वास्थ्य सेवामा सहज पहुँच स्थापित गराउन सो एकाइ स्थापना भएको हो ।

गाउँपालिका र वडा कार्यालयको पहलमा स्थापना भएको इकाईमा स्वास्थ्य परीक्षण, परामर्श र सरकारले दिने निःशुल्क औषधि वितरणको सुविधा उपलब्ध छ । वडा कार्यालयले एकजना अहेव र औषधिको पनि व्यवस्था गरेको छ । इकाई स्थापना भएपछि खिवाङका ९२ घरधुरीका ६५० जनसंख्या लाभान्वित भएका छन् ।

यसअघि खिवाङका बासिन्दा घार र शिखमा रहेको स्वास्थ्य चौकीमा पुगेर सेवा लिने गरेका थिए । सामुदायिक भवनमा एकाइ सञ्चालन गरिएको वडा सदस्य रवीन्द्र गर्बुजाले बताए । वडाध्यक्ष कृष्णप्रसाद बरुवालले इकाई उद्घाटन गर्दै सहज र सर्वसुलभ स्वास्थ्य सेवा प्राप्त गर्ने वातावरण मिलाउन प्राथमिकता दिएको बताए ।