सन्धिखर्क : अर्घाखाँची प्रशासनले प्रदेश ५ को प्रमुख धार्मिक तीर्थस्थल सुपा देउराली आसपासका सार्वजनिक स्थलमा बनेका घरटहरा हटाउने तयारी गरेको छ । गोसिंगे सन्धिखर्क सडक फराकिलो बनाउन सुपा देउराली मन्दिर आसपासका घर टहरा हटाउन लागेको हो । जिल्ला प्रशासन कार्यालयमा बसेको सर्वपक्षीय बैठकले सडक साँघुरो भएकाले ट्राफिक जाम तथा दुर्घटना बढ्न थालेकाले फराकिलो बनाउन मन्दिर आसपासका घरटहरा हटाउने निर्णय भएको प्रमुख जिल्ला अधिकारी खिमराज भुसालले बताए ।
सुपा देउराली मन्दिर आसपास सार्वजनिक स्थानमा घरटहरा बनाई पेसा–व्यवसाय सञ्चालन गरिरहेका झन्डै सय घरटहरा हट्ने भएका हुन् । सार्वजनिक स्थान भए पनि मन्दिर आसपास क्षेत्रमा स्थानीयले पक्की संरचानासमेत बनाएर बसिरहेका छन् । सवारी साधनलाई सरल र सहज बनाउन बाटो विस्तार गर्न थालिएको हो । बाटो फराकिलो भएपछि दुर्घटना कम हुने र अर्कोतर्फ सार्वजनिक जग्गासमेत संरक्षण भएकाले जिल्ला प्रशासन कार्यालयले यस्तो तयारी गरेको हो ।
सुपा देउराली मन्दिर आसपासमा मानिसले पक्की तथा टहरा निर्माण गरी होटल, फलफूल पसल, पूजा सामग्री पसल र फोटो स्टुडियो सञ्चालन गर्दै आएका छन । सबै स्थानमा सडक फराकिलो बनाउने काम भइरहेको तर सुपा देउराली मन्दिर आसपास रहेका घरटहराले गर्दा सडक विस्तार हुन नसकेको सहायक प्रमुख जिल्ला अधिकारी खिमराज भुसालले बताए । जिल्लाका सबै स्थानमा सार्वजनिक जग्गा मिचेर बनेका घरटहरा हटाउने काम अगाडि बढाउन थालिएको उनको भनाइ छ ।
जिल्ला प्रशासन कार्यालय अर्घाखाँचीमा बसेको सर्वपक्षीय बैठकमा प्रमुख जिल्ला अधिकारी खिमराज भुसाल, जिल्ला समन्वय समितिका संयोजक पिताम्बर शर्मा, सन्धिखर्क नगरपालिकाका प्रमुख कमलप्रसाद भुसाल, शीतगंगा नगरपालिकाका प्रमुख सूर्य अधिकारीलगायत सहभागी थिए । बैठकमा जिल्लास्थित राजनीतिक दलका प्रमुख, सुपा देउराली मन्दिर व्यवस्थापन समिति, सडक डिभिजन कार्यालय तथा नागरिक समाजका अगुवा उपस्थित थिए ।
प्रतिक्रिया दिनुहोस !
