चित्तल काटिरहेको अवस्थामा ६ जना गाउँले पक्राउ
टीकापुरः कैलालीको टीकापुरमा जंगली जनावर चित्तल काटिरहेको अवस्थामा प्रहरीले ६ जनालाई पक्राउ गरेको छ । टीकापुर नगरपालिका–२ सीतापुरस्थित गोरख सिंहको कुखुरा फारामभित्र काटिरहेको चित्तलको मासुसहित इलाका प्रहरी कार्यालय टीकापुरको टोलीले छ जनालाई पक्राउ गरेको हो ।
इप्रका टीकापुरका प्रमुख डिएसपी टीकाबहादुर कार्कीका अनुसार पक्राउ पर्नेमा सीतापुरका ३२ वर्षीय गोरखबहादुर सिंह, ३१ वर्षीय भक्तबहादुर थापा र ३८ वर्षीय रनबहादुर थापा रहेका छन् । पक्राउ पर्ने अन्यमा सीतापुरकै ३८ वर्षीय पदम विक, ४४ वर्षीय छत्रबहादुर शाही र ६३ वर्षीय बाँजु चौधरी रहेका छन् ।
प्रहरीले उनीहरुबाट ३४ किलो ३ सय २० ग्राम चित्तलको मासु र चित्तल काट्न प्रयोग गरिएको हतियार बरामद गरेको छ । ‘सोमवार विहान कुखुरा फारामभित्र जंगली जनावर चित्तल काटिरहेको अवस्थामा मासुसहित पक्राउ गरेका हौं,’ डिएसपी कार्कीले भने, ‘पक्राउ गरिएका सबैलाई सेक्टर वन कार्यालय बल्चौर लम्कीमा पठाइएको छ ।’
चित्तल सीतापुर गाउँसँगै जोडिएको भुराखानी, खोटेना वनबाट आएको हुनसक्ने बताइएको छ । गर्मीयाममा वनमा आगलागी हुने भएकाले जंगली जनावर गाउँ पस्ने गर्दछन् ।