हेटौंडा : मकवानपुर प्रहरीले एकसय ६६ केजी लागुऔषध गाँजासहित दुई जनालाई पक्राउ गरेको छ । पश्चिमी मकवानपुरको राक्सिराङ गाउँपालिका–४ बाट बुधबार बिहान स्थानीय सुदिप कोइरालालाई एकसय ५० केजी गाँजासहित पक्राउ गरेको मकवानपुर प्रहरी प्रमुख प्रहरी उपरीक्षक लोकेन्द्र श्रेष्ठले जानकारी दिए ।
लागुऔषध गाँजा बिक्री बितरण गर्दै आएको विषेश सूचनाको आधारमा कोइरालाको घरगोठमा छापा मार्दा गोठको माथिल्लो तल्लामा लुकाई राखेको गाँजा बरामद गरेको उनले जानकारी दिए । कोइरालासँगै अर्का स्थानीय रामकृष्ण ब्लोनलाई १६ केजी ८ सय ग्राम गाँजासहित पक्राउ गरेको छ ।
उनले ब्लोनको घर खानतलासी गर्दा दुइवटा बोरामा लुकाई राखेको गाँजा फेला परेको एसपी श्रेष्ठले बताए ।उनले ब्लोनलाई पक्राउ गर्ने क्रममा अवरोध गरेपछि गोलीसमेत चलाउनु परेको बताए ।
‘ब्लोनलाई नियन्त्रणमा लिने क्रममा अज्ञात ब्यक्तिहरुले बाधा अवरोध गरेकाले एक राउण्ड हवाई फायर पनि गर्नुपर्यो’,उनले भने । प्रहरीले पक्रकार सम्मेलन गरी बुधबार दिउँसो उनीहरुलाई सार्वजनिक गरेको हो । गाँजासहित पक्राउ परेका दुवै जनामाथि थप अनुसन्धान भइरहेको जिल्ला प्रहरी कार्यालय मकवानपुरले जनाएको छ । 
प्रतिक्रिया दिनुहोस !
