प्रदेश ७ मा हेलो सीएमः जनताका गुनासा चार घण्टामै सम्बोधन

धनगढीः जनताको सामान्य गुनासो बढीमा चार घण्टामै सुनवाई गर्ने प्रतिवद्धता गर्दै सोमबारदेखि प्रदेश नम्बर ७ मा हेलो सीएम कार्यक्रम सुरु भएको छ । मुख्यमन्त्री त्रिलोचन भट्टले मुख्यमन्त्री तथा मन्त्रिपरिषद्को कार्यालयमा एक कार्यक्रमबीच हेलो सीएमको उद्घाटन गरे ।

उनले जनताका तत्काल समाधान हुने समस्या बढीमा चार घण्टाभित्र र अरु जस्तोसुकै गुनासा बढीमा सात दिन भित्र सम्बोधन गरिने बताए । उनले प्रदेश सरकारलाई जनताप्रति उत्तरदायी बनाउन र प्रदेश सरकारको अनुभूति दिलाउने उद्देश्यले ७ नं. प्रदेशमा हेलो सीएम कार्यक्रमको सुरवात गरिएको बताए ।

हेलो सीएम कार्यत्रमका माध्यमबाट सीधै जनताका गुनासाहरु सुन्ने र समस्याको समाधान गर्न यो कार्यक्रमको शुरुवात गरिएको मुख्यमन्त्री भट्टले बताए । ७ नं. प्रदेशमा धेरै समस्या रहेकाले ती समस्याहरु आफ्ना जन प्रतिनिधिहरुलाई सुनाउन जनता आतुर पाइएकोले हेलो सीएम कार्यक्रमका माध्यमबाट जनताका गुनासा सुन्ने प्रयासको थालनी गरिएको मुख्यमन्त्री भट्टले बताए ।

हेलो सीएम कार्यक्रमको उद्घाटन गर्दै गर्दा मुख्यमन्त्रीकै गृह जिल्ला डोटीबाट कर्णजंग शाहीले पहिलो गुनासो गरे । डोटीको शिखर नगरपालिका–२ का शाहीले १६६० ९१५२७२३ नम्बरको टोल फ्री नम्बरमा फोन गरेर धनगढी र महेन्द्रनगर लगायका बजार क्षेत्रको ट्राफिक समस्या समाधान गरिदिन आग्रह गरे ।

१६६० ९१५२७२३ नम्बरमा सिधै फोन गरी हेलो सीएम कार्यक्रममा जुनसुकै नागरिकले पनि आफ्ना जिज्ञासा, गुनासा र सुझावहरु राख्न सक्नेछन् । मुख्यमन्त्री तथा मन्त्रिपरिषदको कार्यालयले बिहान ७ बजेदेखि बेलुकी ७ बजेसम्म दैनिक १२ घण्टा हेलो सीएम कार्यक्रम जनाएको छ ।

प्रदेश नं. ७ का मुख्यसचिव लक्ष्मीराम पौडेलका स्वकीय सचिव शिवसिंह ओलीले हेलो सीम कार्यक्रम छिट्टै नै रेडियोबाट पनि प्रसारण गरिने जानकारी दिए ।