ब्राजिल फिफा विश्वकप फुटबलको सर्वाधिक सफल टोली हो । हालसम्म सर्वाधिक पाँचपटक उपाधि जितेको ब्राजिल विश्वकपको प्रत्येक संस्करणमा सहभागी हुने एकमात्र टोली पनि हो । विश्वकप फुटबलको छैटौं उपाधिको योजनामा रहेको ब्राजिल यस पटक पनि निकै सशक्त देखिएको छ । आयोजक रूसपछि आगामी जुन १४ तारिखबाट सुरु हुने विश्वकपका लागि छनोट हुने ब्राजिल पहिलो टोली पनि हो ।
दक्षिण अमेरिकी राष्ट्रहरूबीचको छनोटमा सबैभन्दा माथि रहँदै ब्राजिलले छनोट चरण पार गरेको थियो । ब्राजिलले १८ खेलको दक्षिण अमेरिकी छनोट प्रतियोगितामा १२ जित र एकमात्र हारको नतिजा निकाल्नुबाट पनि यसपटक उसको क्षमता अनुमान गर्न सकिन्छ ।
सन् १९३० बाट सुरु भएको विश्वकप २१औं संस्करणमा पुग्दा ब्राजिल हालसम्म कुनै पनि संस्करणमा छुटेको छैन । ब्राजिलले आफ्नो प्रत्येक सहभागितामा सशक्त प्रदर्शन पनि गरेको छ । ब्राजिलले सन् १९७० यता विश्वकप फुटबलको हरेक संस्करणमा समूहगत चरण पार गरेको छ । ब्राजिल हालसम्म दुई पटक फाइनल, चार पटक सेमिफाइनल र पाँच पटक क्वार्टरफाइनलमा पुगेर रोकिएको छ ।
सन् १९५० र सन् १९९८ मा दुई पटक फाइनलमा पुगेर पराजित भएको ब्राजिल विश्वकप फुटबलको उपाधि रक्षा गर्ने पनि पहिलो टोली हो । ब्राजिलले सन् १९५८ र सन् १९६२ मा लगातार दुई पटक उपाधि जित्दै विश्वकप उपाधि रक्षाको कीर्तिमान बनाएको थियो । ब्राजिलले त्यसबाहेक सन् १९७०, सन् १९९४ र सन् २००२ मा उपाधि जितेको थियो ।
ब्राजिलभन्दा पछाडि रहेका इटाली र जर्मनीले मात्र हालसम्म चार÷चार पटक विश्वकपको उपाधि जितेका छन् । ब्राजिल सन् २००२ मा जापान र दक्षिण कोरियाले संयुक्त रूपमा आयोजना गरेको विश्वकप जितेयता भने केही कमजोर देखिँदै आएको थियो । चार वर्षअघि आफैंले आयोजना गरेको विश्वकपमा समेत ब्राजिल सेमिफाइनलभन्दा माथि उक्लन असफल भएको थियो । त्यसबेला टोलीका महत्वपूर्ण खेलाडी नेमार चोटग्रस्त बन्दा ब्राजिल अन्तिम चारभन्दा अगाडि बढ्न असफल भएको थियो ।
यो विश्वकपमा पनि नेमार नै ब्राजिलको मुख्य हतियार बन्ने पक्का छ । यद्यपि टोलीका प्रशिक्षक टाइटले जिम्मेवारी सम्हालेयता नेमारमाथिको टोलीको निर्भरता केही कम गरेका छन् । त्यसको मतलव ब्राजिलसँग नेमारजस्तै सशक्त अन्य स्ट्राइकर पनि छन् । टाइट प्रशिक्षक नियुक्त भएयता सेन्टर स्ट्राइकर ग्याब्रियल जिसस टोलीका लागि सबैभन्दा बढी गोल गर्ने खेलाडी बनेका छन् । उनले नौ गोल गरेका छन् ।
त्यसपछि मिडफिल्डर पाउलिन्हो र नेमारले सात÷सात गोल गरेका छन् । यसैगरी फिलिप कोउटिन्होले पनि पाँच गोल गरेका छन् । ब्राजिललाई विश्वकपअघि केही चुनौती पनि देखिएको छ । सिजनको मध्यबाटै चोटग्रस्त बनेका स्ट्राइकर नेमार पूर्णरूपमा मैदानमा फर्किसकेका छैनन् । प्रतियोगिताको पूर्वसन्ध्यामा आफ्ना भरपर्दा रक्षक डानी आल्भेस पनि चोटग्रस्त बनेका छन् । अल्भेसले यो विश्वकप नखेल्ने नै पक्का भइसकेको छ । ब्राजिलले विश्वकपका लागि आल्भेसबिनाको २३ खेलाडीको घोषणासमेत गरिसकेको छ ।
ब्राजिलियन टोली
गोलरक्षक : अलिस्सोन (रोमा), कास्सिओ (कोरिन्थियन्स), इडर्सन (म्यानचेस्टर सिटी) ।
रक्षक : डानिलो (म्यानचेस्टर सिटी), जेरोमेल (ग्रेमियो), फिलिप लुइज (एट्लेटिको म्याड्रिड), मार्सेलो (रियल म्याड्रिड), माक्र्युन्होस (पीएसजी),
मिरान्डा (इन्टर मिलान), फाग्नर (कोरिन्थियन्स), थिएगो सिल्भा (पीएसजी) ।
मिडफिल्डर : कासेमिरो (रियल म्याड्रिड), फर्नान्डिन्हो (म्यानचेस्टर सिटी), फ्रेड (साख्तर डोनेट्स), पाउलिन्हो (बार्सिलोना), फिलिप कोउटिन्हो (बार्सिलोना), रेनाटो अगस्टो (बेइजिङ गुएन), विलियन (चेल्सी) ।
स्ट्राइकर : डगलस कोस्टा (युभेन्टस), रोबर्टाे फर्मिनो (लिभरपुल), ग्याब्रियल जिसस (म्यानचेस्टर सिटी), नेमार (पीएसजी), टाइसन (शख्तर डोनेट्स) ।
प्रशिक्षक : टाइट ।
ब्राजिलको विश्वकप
विश्वकप सहभागिता : २० पटक
उपाधि : ५ पटक
फिफा वरीयता : २
यसपाली ब्राजिलको खेल
समूह ‘ई’
जुन १७ : स्विट्जरल्यान्डविरुद्ध
जुन : २२ कोस्टारिकाविरुद्ध
जुन २७ : सर्वियाविरुद्ध
प्रतिक्रिया दिनुहोस !
