नेपालगन्ज गोल्डकप फुटबल २१ जेठदेखि
नेपालगन्जः बाँकेमा सर्वाधिक राशीको फुटबल प्रतियोगिता ‘नेपालगन्ज गोल्डकप’को तेस्रो संस्करण आगामी २१ जेठदेखि हुने भएको छ ।
बाँके जिल्ला फुटबल संघ (एन्फा) ले आयोजना गर्ने तेस्रो संस्करणको मुख्य प्रायोजन टुवोर्ग वियरले गरेको छ । ८औं राष्ट्रिय खेलकुद प्रतियोगिताका कारण नेपालगन्ज रंगशाला निर्माणाधीन रहेकाले खजुरा गाउँपालिका–४ डीगाउँस्थित नेपाल राष्ट्रिय आदर्श आधारभूत विद्यालयको चौरमा गरिनेछ ।
प्रतियोगितामा ए डिभिजनका त्रिभुवन आर्मी, एपीएफ, संकटा क्लब, च्यासल क्लब, लगायत नेपालगन्ज ११, रुपन्देही ११, सुदूरपश्चिम ११ र भारतीय पन्जाब ११ सहभागी हुने एन्फाका बाँके अध्यक्ष भोजराज शाहीले आइतबार नेपालगन्जमा पत्रकार सम्मेलन गरी जानकारी दिए ।
प्रतियोगितामा प्रथम हुने टिमलाई ५ लाख र दोस्रो टिमलाई २ लाख ५१ हजार राशी रहेको छ । म्यान अफ दि सिरिजलाई मोटरसाइकल, उत्कृष्ट स्ट्राइकर, गोलरक्षक, प्रशिक्षक लगायतलाई १०÷१० हजार र म्यान अफ द म्याचलाई मोबाइल दिने आयोजकले जनाएको छ । प्रतियोगिताको ७५ लाख रुपैयाँ बजेट रहेको छ ।
प्रतियोगितामा स्थायीय आयोजकको रुपमा डाँफे युवा क्लब रहेको छ । क्लबका अध्यक्ष तिलकवीर सुनारले रातदिन काम गरेर प्रतियोगिताको ७५ प्रतिशत तयारी पूरा भइसकेको बताए । उनले भने, ‘गाउँमा ए डिभिजन लेवलको फुटबल प्रतियोगिता आयोजना गर्न पाउँदा हामी औधि खुसी छौं ।’ नक आउट विधिमा खेलाइने प्रतियोगिता जेठ २१–२८ सम्म सञ्चालन हुनेछ ।