झाडापखाला प्रकोपको कारण खानेपानीमा ‘कोलिफर्म’
दाङ ः मानिसको दिशामा पाइने जिवाणु खानेपानीको मुहानमा जाँदा शान्तिनगर गाउँपालिकामा विगत चारदिनदेखि फैलिएको झाडापखालाको मुख्य कारण भएको पुष्टि भएको छ । शान्तिनगर गाउँपालिकाको वडा नं ३ र ४ मा फैलिएको झाडापखालाको कारण पानीमा भएको कोलिफर्म जिवाणुले गराएको पाइएको छ ।
तुलसीपुर खानेपानी तथा सरसफाई संस्थाको प्रयोगशालामा गरिएको परिक्षणमा खानेपानीमा कोलिफर्म जिवाणु रहेको पाइएको छ । कोलिफर्मका कारण प्रकोप फैलिएको रिपोर्ट आएको शान्तिनगर गाउँपालिकाको स्वास्थ्य शाखाले जनाएको छ । स्वास्थ्यकर्मी विमल केसीका अनुसार कोलिफर्म मानिसको दिशा पिसाब हुने जिवाणु हो ।
उनले मानिसको शरीरमा रहँदा खासै असर नगरे पनि बाहिर आइसकेपछि सक्रमण बढाउने बताए । गाउँमा झाडापखाला फैलिएपछि स्थानीय विद्यालयमा रहेका पानी ट्याङकी, खानेपानीको मुहान र वितरण भएका धाराको पानी परिक्षणका लागि प्रगोगशालामा लगिएको थियो । सबै परिक्षण गरेको पानीमा कोलिफर्म जिवाणु भेटिएको केसीले बताए ।