नयाँ दिल्ली रहेका मन्त्री यादवको सरुवा, अस्पताल भर्ना भएका राज्यमन्त्री आउट !

काठमाडौं : मन्त्रीपरिषद् पुनर्गठनमा सत्ता साझेदार दल समाजवादी पार्टीबाट सरकारमा सामेल स्वास्थ्य तथा जनसंख्या राज्यमन्त्री डा. सुरेन्द्र यादवलाई अस्पताल भर्ना भएकै बेला मन्त्रीमण्डलबाट आउट गरिएको छ । 

ढाडको समस्या भएपछि वीर अस्पतालमा उपचाररत रहेकै अवस्थामा डा. यादवलाई राज्यमन्त्रीबाट खोसिएको छ । पार्टी अध्यक्ष उपेन्द्र यादवलाई उपप्रधान एवं स्वास्थ्य तथा जनसंख्या मन्त्रालयबाट कानुन मन्त्रालयको जिम्मेवारीमा हेरफेर गरिएको छ । विश्व स्वास्थ्य संगठन (डब्लुएचओ) को कार्यक्रममा भाग लिन मन्त्री यादव नयाँ दिल्ली गएको बेला जिम्मेवारी हेरफेर भएको छ । मन्त्री उनी शुक्रबार काठमाडौं फर्कने छन् ।

स्वास्थ्य तथा जनसंख्या मन्त्रालयका प्रवक्ता महेन्द्रप्रसाद श्रेष्ठले नयाँ मन्त्रीको स्वागत र बाहिरिएका मन्त्रीको बिदाई कार्यक्रम बारे केहि जानकारी नभएको बताए । उनले भने,‘अहिलेसम्म केही पत्तो पाएको छैन ।’

 कानुन,न्याय तथा संसदीय मामिला मन्त्री भानुभक्त ढकाललाई स्वास्थ्य मन्त्रालयमा सरुवा गरिएको छ ।  स्वास्थ्य राज्यमन्त्रीमा नवराज रावतलाई ल्याइएको छ । सुर्खेतका रावत नयाँ अनुहारका हुन् । नयाँ मन्त्रीपरिषद्का सदस्यलाई आज बिहान ११ सपथ ग्रहण गराइने कार्यक्रम तय भएको छ । समाजवादी पार्टीबाट मन्त्रीपरिषदमा सामेल अर्का मन्त्री मोहम्द इश्तियाक राई सहरी विकास मन्त्रालयमा यथावत छन् । सरकारबाट बाहिरिन समाजवादी पार्टीलाई दबाब परेको छ ।