राजीनामा नदिने मुडमा प्रधानन्यायाधीश, हेर्न थाले मुद्धा
कात्तिक १०, २०७८ बुधबार १४:३३:०
काठमाडौं : न्यायीक नेतृत्वले न्याय क्षेत्रमा विचलन देखाएको आरोप खेपिरहेका चोलेन्द्र शमशेर जबरा दबाबमा रहेपनि राजीनामा नदिने मुडमा छन् । प्रधानन्यायाधीश एकातिर छन् भने सर्वोच्चकै न्यायाधीशहरु र कानुन व्यवसायीहरु अर्कोतिर छन् ।
जबराले संवैधानिक व्यवस्थाअनुसार आफू नियुक्त भएको भन्दै सडकबाट आन्दोलन हुँदैमा आफूले राजीनामा नदिने प्रतिकृया दिएका छन् । न्यायाधीशहरुको इजलास बहिष्कारका बीच जबराले बुधबारदेखि मुद्धा हेर्न थालिसकेका छन् ।
सर्वोच्चअनुसार जबराले बुधबार इजलास तोकेर मुद्दाको सुनुवाइ गरेका हुन् । दुई मुद्धामा कारण देखाउ आदेश जारी गरेका छन् भने एक मुद्दा तामेलीमा राखेका छन् । उनले एउटा मुद्दा फिर्ता गर्ने र अर्कोमा कैफियत माग गर्ने आदेश दिएका छन् ।
तर, १५ न्यायाधीशहरु इजलास तोकिएकै समयमा आन्तरिक छलफल भन्दै सांकेतिकरुपमा इजलास समेत बहिष्कार गरेका छन् । उनीहरुले प्रधानन्यायाधीशको राजीनामा माग गरेपनि सुनुवाइ भने भएको छैन ।
संवैधानिक निकाय, राजदूत र मन्त्रीमा भाग मागेको, न्यायाधीश हरिकृष्ण कार्कीको नेतृत्वमा गठन भएको सुझाव कार्यदल कार्यान्वयनमा चुकेको र न्याय परिषद्बाट मनपरी न्यायाधीशहरुको सरुवा र नियुक्तिमा चलखेल गरेकोजस्ता प्रधानन्यायाधीशमाथि आरोप छन्।
वरिष्ठ अधिवक्ता शम्भु थापाले प्रधानन्यायाधीशको पब्लिक लिगल अडिटका लागि टिम खडा गर्न माग गरेका छन् । उनले भने, 'त्यसले अडिट गरेर देखाउँछ के रै छ कसो रैछ भन्ने कुरा । अडिट गर्दा को को तानिन्छन् । जो पर्छ पर्छ । सबैको अडिट हुन्छ । प्रधानन्यायाधीशले न्याय प्रशासनमा सम्पादन गरेका कुराहरु न्याय सम्मत भएनन् । न्याय प्रशासन उपयुक्त भएन भनेर उहाँको कार्यक्षमताको विषयमा प्रश्न उठेको छ । प्रधानन्यायाधीश पदमा बसिरहँदा न्याय सम्पादनमा गम्भीर क्षदविक्षद हुने र न्याय विचलित हुने भनेर सबै कानुन व्यवसायीहरुको निष्कर्ष छ । ’
उनले भने,‘प्रधानन्यायधीश आफैले माननीय न्यायाधीश हरिकृष्ण कार्कीको अध्यक्षतामा गठन गरेको प्रतिवेदनमा न्यायाधीशलाई नै विचौलीया राखिएको छ भन्ने कुरा उल्लेख छ । विचौलिया समाप्त गर्न प्रधानन्यायाधीश गम्भीर देखिएनन्, प्रधानन्यायाधीश जबरा पदमा रहँदासम्म कानुन व्यवसायीहरु आजदेखि सर्वोच्च अदालतमा बहस नगर्ने बताए । कानुन व्यवसायीहरुले वर्तमान गतिरोधको जिम्मा प्रधानन्यायाधीशले लिनुपर्ने अडान लिएका छन्।
प्रतिक्रिया दिनुहोस !
