काठमाडौंः नेकपा एकीकृत समाजवादीका सम्मानित नेता एवं पूर्वप्रधानमन्त्री झलनाथ खनालले जबरजस्ती एमसीसी पास गर्न नहुने बताएका छन् । संसद बैठकपछि नेता खनालले दलहरुको सहमति बेगर एमसीसी सम्झौता संसदमा टेबल गर्न नहुने बताएका हुन् ।
उनले भने, ‘एमसीसी जबर्जस्ती टेबुल गर्न हुँदैन । कतिपय विषय परिमार्जित हुन्छन्, परिस्कृत हुन्छ, बदलिन्छ अनिमात्रै सहमति हुन्छ ।’ एमसीसी संशोधनपछि मात्रै अनुमोदन गर्नुपर्ने उनको भनाइ छ ।
यस्तै, नेकपा एकीकृत समाजवादीका प्रमुख सचेतक जीवनराम श्रेष्ठले एमसीसीको विषय टेबल गर्न छलफलको वातावरण हुनुपर्ने बताए । प्रतिपक्षीको संसद अवरोधकाबीच एमसीसी टेबल हुन नहुने उनको भनाइ छ ।
उनले भने, ‘संसदमा छलफलको वातावरण छैन । अवरोध भइरहेको बेला टेबल गर्दा सांसदहरुले छलफल गर्न पाउँदैनन् । यो राष्ट्रिय महत्वको विषय पनि हो । एमालेको तर्फबाट कोही नेता पनि सहभागी भएनन् ।’
प्रतिक्रिया दिनुहोस !
