मनोज पुनले नागरिकता बिना पासपोर्ट लिएको खुलासा

परासी : गएको बुधबार प्रहरी इन्काउण्टरमा मारिएका गुण्डा नाइके मनोज पुनले नागरिकता बिना नै जिल्ला प्रशासन कार्यालय नवलपरासीबाट मेसिन रेडिएबल पासपोर्ट (एमआरपी) लिएको खुलेको छ ।

इन्काउण्टरमा मारिएपिछ फेला परेका कागजातका आधारमा प्रहरीले पुनका दुई नागरिकता र राहदानी भएको बताउँदै आएको छ । तर जिल्ला प्रशासन कार्यालयबाट लिएको राहदानी नागरिकता बिना नै लिएको पाइएको छ ।

राहदानी लिँदा पुनले अर्कै व्यक्तिको नामको नागरिकता नम्बर उल्लेख गरेका छन् । पुनलाई राहदानी दिलाउन कर्मचारीकै मिलमतोमा भएको आशंका समेत गरिएको छ ।

जिल्ला प्रशासनको रेकर्डमा पुनले सुनिलकुमार रानाको नाउँबाट २०७२ असोज १८ ( ५ अक्टुबर २०१५) मा राहदानी लिएको देखिएको छ । राहदानी नागरिकताका आधारमा दिने र राहदानी फारमसँगै नागरिकताको प्रतिलिपि संलग्न गर्नुपर्ने प्रावधान छ ।

पुनलाई प्रतिलिपि बिना नागरिकता नम्बर मात्रको आधारमा राहदानी दिइएको पाइएको छ । राहदानी फारममा उल्लेख गरिएको ८५८६४ नम्बरको नागरिकता नवलपरासी सरावल गाउँपालिका–७ का कुमार चौधरीको रहेको जिल्ला प्रशासनले जनाएको छ । चौधरीले २०६२ फागुन १६ गते नागरिकता लिएको रेकर्डमा उल्लेख छ ।

राहदानी लिन आउँदा सक्कल नागरिकता हेरेर कर्मचारीले नागरिकता फाँटमा अभिलेख भिडाउने गर्छन् । अभिलेख दुरुस्त देखिए मात्र राहदानीका लागि अधिकृतले प्रमाणित गरी सिफारिस गर्ने प्रावधान छ । सबै प्रकृया पुरा नगरी राहदानी दिएको पाइएपछि कर्मचारीले ठूलै आर्थिक चलखेल गरेको आशंका गरिएको छ ।

पुनको उक्त राहदानीमा तत्कालिन प्रशासकिय अधिकृत रमेश गौतमको हस्ताक्षर छ । गौतम हाल अर्घखाँचीको सन्धिखर्क नगरपालिकामा प्रमुख प्रशासकिय अधिकृतको रुपमा कार्यरत छन् ।
जिल्ला प्रशासनको रेकर्डमा पुनले राहदानी लिएको मितिमा २७ जनाले राहदानी लिएको पाइएको छ । सबै जनाको राहदानी फारमसँगै नागरिकताको प्रतिलिपि संलग्न छ भने पुनको भने प्रतिलिपि संलग्न छैन । रुपन्देहीको देवदह निवासी पुनले नवलपरासीको सुनवल नगरपालिका–१ को ठेगाना उल्लेख गरेर ०५२१७४८८ नम्बरको राहदानी लिएका हुन् ।

प्रमुख जिल्ला अधिकारी उदयबहादुर राना मगरले राहदानी फारममा नागरिकताको प्रतिलिपि संलग्न हुनपर्ने भएपनि रेकर्डमा नदेखिएको बताए । ‘जिल्ला प्रशासन कार्यालयबाट सुनिलकुमारको नाउँबाट नयाँ नागरिकता बनाएको भने देखिएन । राहदानीमा नागरिकताको नम्बर मात्र उल्लेख छ । अनुसन्धानका क्रममा नागरिकता नम्बर मिलाउँदा अर्कैको देखिएको छ ।’ प्रजिअ मगरले भने ।

राहदानी लिँदा नागरिकताको अभिलेख भिडाउनु पर्ने र त्यती बेलै झुठो कागजपत्र पेश गरिएकोबारे कर्मचारीले हेक्का राख्नु पर्ने उनलको भनाइ छ । नागरिकता बिना नै राहदानी दिनुमा कर्मचारीको कमजोरी भएको उनले बताए । पुनको नागरिकता र राहदानी बारे सम्बन्धित निकायले विवरण माग गरेकाले सोही अनुसारको उल्लेख गरेर पठाइएको उनले बताए ।

विभिन्न व्यक्ति हत्याका योजनाकार रहेका पुनलाई प्रहरीले मोस्ट वान्टेड सूचीमा राखेको थियो । उनी गत बुधबार रुपन्देहीको देवदह–४ भवानीपुरमा प्रहरी मुठभेडमा मारिएका हुन् । मुठमेडमा पुनसहित उनका सहयोगी मानिएका सोम आलेसमेत मारिएका थिए ।

२०७३ पुस ४ मा युवा संघ रुपन्देहीका अध्यक्ष दुर्गा तिवारीको बुटवलमा हत्या भएपछि उनी गुण्डा नाइकेको रुपमा चर्चित थिए । उनी माथि २०७४ पुसमा रुपन्देहीको देवदह नगरपालिका–५ का व्यवसायी बलु भनिने वसन्त पौडेल र निर्माण व्यवसायीका अध्यक्ष शरदकुमार गौचनको हत्या योजनाका मुख्य नाइकेको रुपमा प्रहरीले खोजी गरिरहेको थियो ।