पेशावर : पाकिस्तानको खैबर पख्तुनवा प्रान्तमा शिख धर्मगुरु चरणजीत सिंहको हत्याको विरोधमा सरकारविरुद्ध प्रदर्शन भएको छ । चरणजीत सिंहको हत्यापछि कुनै कारबाही नभएको भन्दै प्रदर्शन गरिउएको हो । धर्मगुरु चरणजीत सिंहको २९ मेमा गोली हानी हत्या गरिएको थियो । ५२ वर्षीय चरणजीत सिंह धर्मगुरुका साथै मानवाधिकारको पक्षमा आवाज उठाउँदै आएका व्यक्ति पनि हुन् । उनले पाकिस्तानमा अल्पसंख्यकको पक्षमा आवाज उठाउँदै आएका थिए ।
प्रहरीले आतंकवाद नियन्त्रण निकायसँग मिलेर काम गरिरहेको बताएको थियो । प्रदर्शनकारीले भने उनको हत्यामा पाकिस्तानी गुप्तचर निकायको हात रहेको दाबी गर्दै आएका छन् । पाकिस्तानमा अल्पसंख्यकको पक्षमा आवाज उठाउने व्यक्तिलाई सरकारी संरक्षणमै आक्रमण र हत्या गर्ने गरिएको उनीहरूको भनाइ छ । खासगरी जुलाईमा हुने निर्वाचमा उम्मेदवार बन्न सक्ने व्यक्तिको छानी छानी हत्या गरिन थालेको प्रदर्शनकारीको कथन छ ।
पेशावरमा शिख समुदायका प्रमुख रादेश टोनीले आक्रोश व्यक्त गर्दै भने, ‘यस्तो अत्याचार हामीले कहिलेसम्म सहनुपर्ने हो ? हामीलाई न्याय दिन सरकारले के गरेको छ ? १० जनाको मृत्यु भइसकेको छ ।’ यस्तो अवस्थामा सरकार मौन बसेको शिख धर्मावलम्बीको भनाइ छ । शिख सामाजिक कार्यकर्ता हरजीत सिंहले थुप्रैको हत्या हुँदा पनि सरकार मौन बसेको आरोप लगाए । हरजीतले भने, ‘सन् २०१४ मा भएका आक्रमणका दोषीलाई अहिलेसम्म पनि पक्राउ गरिएको छैन । हामी पाकिस्तान सरकारसँग अनुरोध गर्छौं, अपराधीलाई तत्काल पक्राउ गर ।’
पाकिस्तानमा बसोवास गर्दै आएका शिख मौलिक अधिकारबाट पनि वञ्चित छन् । खैबर पख्तुनवाका सामाजिक कार्यकर्ता सना एजाज भन्छिन्, ‘यहाँ सिर्जना भएको तनावपूर्ण वातावरण शान्त गराउनुको साटो निर्वाचनको मुखमा अल्पसंख्यक नागरिक विरुद्ध यस्ता आक्रमण र हिंसा हुने गरेका छन् ।’ राजनीतिक फाइदाका लागि सरकारले यस्ता अल्पसंख्यकमाथि अत्याचार हुँदा सरकार मौन बसेको उनको भनाइ छ ।
देशका सबै नागरिकको रक्षा गर्नु राज्यको उत्तरदायित्व भएको उनले बाइन् । पाकिस्तानका मुस्लिम, शिख, इसाई वा हिन्दु जो भए पनि राज्यले रक्षा गर्नुपर्ने उनको भनाइ छ । उनले भनिन्, ‘हाम्रो सरकार अल्पसंख्यक समुदायका व्यक्ति मारिनकै लागि जन्मिएका हुन् भन्ने व्यवहार गर्छ ।’ यस्ता व्यक्ति मारिएर आफूलाई केही फरक नपर्ने व्यवहार राज्यले देखाएको उनको कथन छ ।
प्रतिक्रिया दिनुहोस !
