२० वर्षदेखि ‘फरार’ वडाअध्यक्ष पक्राउ
राजविराजः गाउँमै राजनीति गरिरहे पनि ज्यान मार्ने उद्योगमा फरारको सूचीमा रहेका एक वडा अध्यक्ष २० वर्षपछि पक्राउ परेका छन् । तिरहुत गाउँपालिका–३ का वडा अध्यक्ष श्यामनारायण भनिने भोगानन्द महात्मान यादवलाई प्रहरीले घटना भएको २० वर्ष तीन महिनापछि ज्यान मार्ने उद्योगमा पक्राउ गरेको छ ।
पक्राउ परेका यादव २०७४ सालमा सम्पन्न स्थानीय तहको निर्वाचनमा वडा अध्यक्षमा निर्वाचित छन् । २० वर्षको अवधिमा इलाका प्रहरी कार्यालय कञ्चनरुप र सम्बन्धित प्रहरी चौकीमा दर्जनौ प्रहरी प्रमुखहरु परिवर्तन भए ।
सबै प्रहरी प्रमुखहरुले हालसम्म गाउँमै राजनीति गरिरहेका वडा अध्यक्ष यादवसहित घटनाका आरोपितहरु शिवन भनिने शिवनारायण महात्मान, राजेन्द्र महात्मान, भुवनेश्वर भनिने हुमेश्वर साफी र बौवालाल साह गाउँघरमा खोजतलाश गर्दा फेला नपरेको भनी प्रतिवेदन बुझाउँदै आएका छन् ।
पाँचै जना आरोपितहरु फेला नपरेको भन्दै प्रहरीले घटनाको २० वर्ष पुग्न एक दिन बाँकी रहँदा जिल्ला अदालतमा मुद्दा बुझाएको छ । अदालतले फागुन १५ गते वारेण्टसहितको ७० दिने म्यादी पुर्जी जारी गरेपछि पनि प्रहरीले वडा अध्यक्ष यादवसहितका आरोपितहरु गाउँघरमा फेला नपरेको भन्दै जेठ ६ गते म्यादी पुर्जी घरदैलोमा टाँसी म्याद तामेल गरेर फर्के ।
पैसाको चलखेल र राजनीतिक संरक्षणकै कारण कर्तव्य ज्यान र ज्यान मार्ने उद्योगका अभियुक्तहरुलाई प्रहरीले पक्राउ नगरी कानुनी प्रावधानअनुसार २० वर्ष पुगेपछि मात्र मुद्दा बुझाउने गरेको कानुन व्यवसायीहरु बताउँछन् ।
राजनीतिक कारणले नै ०५४ फागुन ३ गते आरोपितहरुले बिरेन्द्रप्रसाद ठाकुरलाई ज्यान मार्ने प्रयत्न गरेको भन्दै घाइतेका दाजु ननु ठाकुर हजामले तत्कालै उजुरी दिएका थिए । उजुरीमा विपक्षीहरु र उनिहरुको पार्टीलाई समर्थन नगरेका कारण पानी पटाउन खेत गएका बिरेन्द्रलाई आरोपितहरुले हत्या प्रयास गरेको उल्लेख छ ।
त्यस उजुरीमा ‘हाम्रो शत्रु यही हो’ भन्दै आरोपितहरुले धारिलो फर्साले वीरेन्द्रको टाउकोमा प्रहार गरेको र घाँटी छिनाउने मनसायले प्रहार गर्दा बिरेन्द्र गम्भिर घाइते भएकाले कारवाहीको माग गरिएको थियो । प्रहरीले सो उजुरी ०५४ फागुन ११ गते दर्ता गरेपनि २० वर्षसम्म कसैलाई पक्राउ गरेन् ।
पक्राउ परेका वडा अध्यक्ष यादव जिल्ला अदालतको आदेशमा सोमबार ४५ हजार धरौटी राखी पुर्पक्षका लागि तारेखमा रिहा भएका छन् । अन्य आरोपितहरु हालसम्म पक्राउ परेका छैनन् ।